PALLISA – Ejaasi ibakor konye egitigita adokena kec. Mam ijo aticepak ijenuni karai mam ijo iwanyunitor eipone ican kalu.
James Amuriat kojena kwape Kiwanuka lo ocaalo loko Agurur eitela Kobuin etem Akisim ko Pallisa distrikt ngesi itorit adoketait na etiono noi.
Erai apipilu kede aimony nesi irumit Amuriat lo ejai adeka aitobosikin otogo
Amuriat inerakinos ka Aicerit ngesi abala ebe, ejari lem ngesi keda abwangabwang amoru konye okaru 2019, abu ngesi akuwan ogeu bala esumeredede ekaulo iriokumete abelekeka kolomakini akuwan ainyam bala akim.
“Ibiroki eong adeka na togo adaun ekaru, kwape iteo ijo eong, abu akan odengor. Kwape kwana ekeje ka akan na ideuna kesi mam edaunete apak na ewoj apaikini eong emulangang toni atwanare,” abala Amuriat.
Rose Akitui, aberuke Kiwanuka na idwe 7 ngesi abala ebe, esitor ngesi adeka ngin ationis na elangir konyami komam esei inyamat.
Akitui ngesi elipit agangat kane ejaasi itunga tetere edumuni inyamat,esabunyu, agilabun, ajuseta naarai ibarei osawan kere kopol apipilu na noi.
“Abosis na angirikit eong mam erai na epatana. Arai ber ekuriaka itunga ates. Dobofo konye abosis na elomuni kane ejai lo kwana adaun ekaru eperi. Irima isio adekesia agaun ko Kameke, Pallisa toni Mbale da,” abala Akitui.
Sam Opolot, arucokiniton atukot naka RAPSADO na igangit apedorosio ngesi abala ebe, akoto itunga aigang Amuriat kede agangat karaida erai sh500.
Abala ebe, epol alangiru na ibakor kangul ido edolit itunga aijukanakin agangat ne ejai John Julius Okaki lo erai ekasela loseuna tetere aberu na ingarakinor.
Opolot ngesi abala ebe, ekot itunga kacut Iteso aitoduun amina kowai lo aingaranakin.
Ebodaboda ediopet lo emunonit ekiror ke kanu ayuara ko Akisim TC ngesi abala ebe, elimilimitai ebe aticepak abu Kiwanuka okokote konye kingisi kopegi ebe, ipaupake lu apotu kocamutu kesi aponi ilongarai.
Rose Amulen ngesi abala ebe, ekot ekanisa koloma akiro ke Kiwanuka tetere ilipakinio ngesi kede aisinapikin aomisio tetere emoyo ke edumuni ainapakin.
Mam ber bobo eipone adeka kana etakanunitor ko Pallisa ido ejalakit itunga eroikit etasuro.
