katakwi – Kikunkung ijo ingaikinio, kimo idumuni! Eraasi 28.4.2021 nesi abu Japan kobongokino aimony nako Katakwi distrikt.
Abu Japan kingarak adukokin atukono Oriau PS akaulo, John Bosco Okiror, atupiton emanimanan isomeroi apesikin ailipa ngin eraasi 15.3.2019.
Ican lu etoritos esisiak kesi apotu kicumata Japan etau naarai amamete atukono kede abawoi kanu idwe aiboi.
Abu Japan koduk atukono awongon, eyapesi, acoloonin kede abwoi 159.
icie iboro kesi; imesan 2, icolongo 11. Apiyai nu edeparitos sh300m kesi itosomaritai.
Fukuzawa Hidemoto, abwoikiton Japan ko Uagnda ngesi ekopakini Katakwi iboro ngun kere kosabiiti lo atubor ido abala ebe, erai ngin agangat naka Grant Assistance for grassroots Human Security Project (GGP).
Abala ebe, adau Uganda aimedaun kotoma oprojectan lu edolete 268 ageun nokaru 1992.
Abu kining eyaitone aidar agangat ngin ejok.
James Peter Okoel, apolon esomero lo Oriau ngesi ebe, ebuni asioman aiten kanu agangat kangin.
“Ajasi lem idwe 859 konye eyatakinos kitoni 1,041,” abala Okoel, kopol aimuriamuria koreet ke.
George Obai, SMC lo Oriau PS ngesi abala ebe, edukitai esomero ngol okaru 1952 ido eraasi lem adukena nu epunget noi.
Itogoi lu eperete imwalimun kesi bobo elipit Obai kodukokinai Oriau PS.
Angela Atim, apolokinton nu asioman kodistricta lo Katakwi ngesi abaal ebe, ebuni eyapesi lo asioman aitaraun esomero ngol awanyunet.
Walter Elakas Okiring, apolon eicolong loka LC5 ngesi elipit ipadic aiyatakit aigangit esomero ngol.
Abala ebe, ebuni edistrikt atiakar apiyai kanu aitemonokina atukono nu ejaasi osomero ngol.
‘Elipit eong yesi itunga luko Magoro alemar adeka na amunamun atukono awadikatoi,” abala Elakas.
John Stephen Ekoom, RDC loko Katakwi ngesi abu itunga acakar aidem alupok kane ejaasi isomeroi tetere asioman elosi ejok.
Idwe lu kosomero kesi apol ailel noi ido esumunikitos aiting itaaboi ka aburaco.
