Isiriamun ko Pallisa distrikt kesi ekenyakin aisingaren asioman na idwe kec kwape apukorere isomeroi kanu ataamu naiyareit.
Sheikh Abubakar Mujumbi, ekayaiton lo isiriamun ko Pallisa kwape ekadi nesi alimuni nu itolosi ailipasinei nuka Eid kalaro na Emisikit loko Masqid Noor.
Mujumbi ngesi abala ebe, mam ajok aremokin apiyai nupe ejaasi ber opucit lo Isiriamun karaida ejai aiyalama.
“Atumunak, mam eong akoto apupun ebe inacaros yesi kotoma akiro nu ediini kolomarete imereta, aelo ebe naarai ingetakisi apaarasia 30 nu ailung,” abala Mujumbi.
Konye keja ngun Idi Mayanja lo iswamae orionget lo eipamone, eswamak ka apol na atutubena ngesi abu isiyalamik isiriamun lu apotu kotukutu apiyai kanu agwelakina inacan lu ejaasi awenesia nu Kamuge ka Agule inyamat tetere kesi inuminumete Eid ejok.
Patrick Duchu, apolon eicolong LC5 ko Pallisa ngesi abu kolimok isiriamun abolobol kalucie amaria aswamisinei nu itijenarit DSC.
Iwalarit apaaran na ainumunum epucit loka Eidi kodaunite ber MP na aberu ko Pallisa, Kevin Kaala Ojinga aigang Isiriamun ka ainapeta nu aiwod.
Itunga lu edolitos 1,800 kesi apotu kipinyata ainyam epucit ke Kaala.
Sheikh Abubakar Mujumbi lo erai ekadi lo Pallisa ngesi abu kitur Kaala kanu angesar aimorikikin isiriamun kere.
