Atukot naka aramak luko Teso kojena kwape Teso Musicians Organization (TEMO) nesi amonyaki President Yoweri Museveni aitodolikin aisumunete ke.
Inerasi ka arotak iyemuto pac, angurianete ebe, akaulo kesi airiamun ka President Museveni ko Soroti eraasi 14.06.2019, abu President kisumun agwelakinio kesi; eredio lo apolon, amotokana enapit eredio ka aramak, akituk nu akile kede studio lo itolomere ikososinei.
Gen Fita, ediope k’apeleunak atukot na ngesi abala ebe ikapun lu edolete aritai sh6.5bn kesi alacunitai kanu aremokin asusuaitin nu aramak konye toni lolo mam ikapun ngun ejena ne adoloto.
Anguriani Gen. Fita ebe, irimokinitos engarenok kec da kede ekiror egurupu kanu anyamia bonik. Etukurianete aramak atubor opate loko National Unity Platform karai mam President Museveni itemokini ationis kec.
“K’apaaran ngin, Peter Ogwang, eminista lo akompuitan ngesi kobu isumun aramak imilionin 5 kede arucokin isio ne ejai eministri lo akiro nuko Teso kanu adumun abaatin konye idar isio toni lolo,” eyatakinit Gen Fita Man.
Sticky Bwai, etoloman ikososinei ko Teso edolit President Museveni aitemokin ationis kec naarai apotu kolo kesi kicata aisupakin ngesi abootin.
Scorpion, lo ejenara kanu ekosio ke lo ebe Ekenyai ngesi angurini ebe, ipudesia kec kesi mam epodokitai konye kotapite aibuk apiyai ne ejaasi aramak luko Kampala.
Dr. Art man, lo ingarenikit aramak luko Serere ngesi ekeunit ebe, ageutu aramak luko Serere aite ngesi erono kitoronitos ngesi kanu ebe anyamar apiyai.
Uncle Ben, atupiton apolokiton aramak ngesi acamunit ebe, ejaasi lem aramak emonyete noi kanu aisumuneta ngun konye mam ber kesi kwape engarenok epupunitos adis akiro kama ejasi engarenok.
“Epedori edio araman alosit opate lo ekotokin ngesi olope naarai mam imikitai konye elipit eong aramak adumun atiting,” abala Uncle Ben.
