AMURIA -Nape iwalari akwap Naikanyet araasi 4.9.2020, konyaara lu abwaak kopate loka NRM atorobusio naarai ajenete ebe arai aitiak kede aseak. Esomasi ngun ko Uganda kere ido apol itunga aimat akipi ne alomakinatar icie ailok emakoode kanu ajiun ipelueik. Apolouke ebe, mam idistriktan lu Amuria ka Kapelebyong edeunitai. Karaida ibwokitos icie akanin, ipu lu ecurosi naarai ejai kwana amuno alomar aikul aijar.
Epu aiboisio nu ajai NRM aileleb kodistriktan ido ko Amuria ajai aseo na MP naka angor ne aboloboloeta MP Suzan Amero kokonyakina kede Rhoda Acen, karaida ajaasi apaupa kec acie nu epudasi anyamar aiboisit ngin. Abu Acen kokakau abootin 19,831 (44%) ailany Amero na abu kikatu 10,402 (23%). Acie angor nu ajaasi abolobolo ngin kesi; Eunice Aliamo na abu kodum 8,298 (18%), Dinah Acanit 6,076 (13%) kosodi Margret Alupo ajiun 814 (2%). Ko obuku lo Orungo, Francis Oluma lo kolo arai LC 5 Amuria ngesi aponi kilanyai kotoma abolobol kangin kowai lo ikiliok lu elosete airabet na polon. Abu Gen. JeJe Odongo kolatak Oluma kwap akaulo na amudun abootin 15,326 (85%), kosodi Oluma adumun 2,524 (14%). Abraham Opio lo aboloboloete ka kesi ngesi abu okarapikin 192 (1%).
Obuku lo Amuria, nesi abu eminista Musa Ecweru kilanyia Simon Peter Amolo ka Augustine Opolot lu aboloboloete kanges. Abu Ecweru kokakau abootin 20,755 (67%), Amolo 9,998 (32%) kosodi Opolot adumun 380 (1%). Akiro nu kesi abu John Peter Erabu, lo eyait nu aseo naka epate loka NRM ko Amuria kolimo kosodi aitigogong. “Akoto eong aicorakin yesi lu idakata imederan kalu elanyi asalakin iswamanara kwape idwe lu ekale ediopet,” ecori Erabu.
Gen. JeJe Odongo ngesi abala ebe ajeni ngesi ebe ilanyi ipaupa ke naarai eroko itunga lu obuku lo Orungo emunosi ngesi aiyatakin aijanakin. “Adautu itunga aitiak isio, mam eong abuni aite ipaupa ka erono. Kwana elipit do eong kesi aiswamanar ka eong,” enera Odongo oreke lo Acanipi kotem Akeriau. Achen ngesi abala ebe arai Edeke elope ngesi akotor ngesi aitub kotoma aseo kangin kilipite itunga aiyatakin aigang ka ainakin ngesi abootin kotoma aseo na koingaren.
Lu abu arereng na aitub kinac kotoma aseo kangin kesi mam ber idumunit kaidules arai epote abongun kwape lu obonipe naarai aroko etasuro itingarit ido lu ipu kesi agwetaritos isimun kec. Konye lu adakata imederan kesi eroko ngaren kec emwana naarai epote atereikin ka lu akapakin kopatei icie. Aseo na awasia kanu aijililiun lu epote anyamar icolongo lu egelegela nesi do eponio aitolot okaru ngol. Kanu amariaun ebuku loko Kapelebyong, ne abwoitotor Johnson Malinga, Anthony Esenu ka Micheal Ebiu Erwau, mam akiro apataka kangina. Abu Esenu kocapacap luok kede akudep ekakau abootin 10,454, Malinga 5,043 kosodi Ebiu aikiaun 431.
Ibore ebirori Amero
Mam lem MP Amero iwiritor ainap akwap kotoma aseo kere. Amero na amaikina kwape agamiat nako Amuria ngesi ilalai akaulo na Achen aidediar ngesi akeje kuju. Ipiriotin lu aseo lu mam ekotosi kolimorai ikiroria kec kesi ebalasi ebe aibiror Amero elomunit naarai abu ebe kitepeg aijulio na ekisil lo ikaru (Art 102 (b). Ido ko Teso Amero ka Monicah Amoding kesi angor nu apotu kongerokisi ekisil ngon. Ido aibiror kec esubit bala etacit. Edinget kiding eminista Musa Ecweru kede Amero. Mam lu iyarei isomanaara cut. Esubitos bala ikapa kede emir. Nu elimuni idiopet eraasi amamiak kane ejai yenice. Idila MPs lu arat kane ejaasi itunga apolouke ebe emina idiopet kakesi igangite yeni itepegi idiopet.
Pac, apotu kolomutu koyemuto ebe ajai engunget kiding MP Amero ka ecaiman LC5 loko Amuria, Robert Okitoi, ido apotu luok koretonokinos atenak nu ipu neda abalare ebe kobongo Okitoi ore kec loko Kapelebyong. Iripootan lu aingic ka eitaabo lo etukere akiro kairabet nesi itodunit edila MP Amero, angedunun enooti konye airabet na itomonet pac atutubet nasodit nesi abu Amero kopicilikinor adiope ido abu kikeun toni akany. Kingolia ijo ewai lo asioman ko Amuria ijesuna kwap neasurio Amero esisianakinak kanu aijwalaunit epelu kec.
Ajenara ke Achen kwape MP na ebwoikit angor airabet Naikanyetaarei, nes esubit bala abu kijaik ngesi arereng na adipio Amero akwap. Abala asean ediopet ebe ejeni Achen Amuria kere, ido kanu iyapia apol ka atiakatiaka, apotu aseak kiitutu Achen kanu aitam ayaun aipuc. Konye osawa lo idoyo okalaamu, ekilikila Amero ebe egurokina aseo ido elalai ebe ebuni aibwo kwape abonipe ido karai kilanyi ngesi elemuni ijam ke airabet.
Konye Achen ngesi aola ebe adol apak Amero alemun epar ke kosodi akerun ore eroko akiro erokiara. Obuku loko Orungo, mam arai aumokin ebe abu Gen. Odongo kotub naarai ayapiei otunga ido isomat aswamisio nu elangir noi ibore mam Oluma apedori abilar otauon aseak. Mam aseo nako NRM itolositai kanu asekum aberu na edakit emeedera ko Kapelebyong, naarai pac adaunita aitolot aseo ne abu Jacinta Atuto kidediara apaupa ke akany.
Kowai kalo eminista Ecweru mam erai nu aumokin ebe abu kotub naarai esoma iboro swi ne ejaasi itunga luko Teso aimoriarit Amuria kwape eraar eminista lo engeso ka ikerai. Apolouke ebe mam Imuriatok ekotosi acakar arereng kec.
