SERERE – Kwape kwana idopitotor akiro nu aseo kanu ekaru 2021, icasitos itunga itunga airereun eipone lo eingarenon lo edolit aijaikin arereng.
Karaida itoikitos itunga aki kanu aijilil aisumuneta nu aseak, mam luko Serere epalaritos tai. Adautu icie aigerun iboro lu ekotosi kesi engarenok aitetenar karai ijaikin kesi arereng na asipokin oyapesin lu egelegela.
Kobuku Kasilo eracunitos aseak iboro swi lu ekotosi kesi kitetenarai. Abalasi aseak ebe, adalacikin apol na kobuku Kasilo kwap cut kowai lo irotin, angaleu, akoru kede asioman kobalasi ebe aseo naka 2021 nesi elosi ayangaun aijulakinet na itekoro kobuku.
Simon Okello lo kotem Bugondo ngesi akudiani ebe, ekoto lolo kana asekun engarenon lo ebuni asesen akiro nu irotin.
Abala Okello ebe irotin nu ipu kesi kwana mam bobo itorosi ido icie kesi eraasi aiced kanu itunganan atubor kotoma kec.
“Ejai erot lo enyouni kotem Kabulabula aibe Kagwara, mam bobo itoro da karai emamei ataker. Lolo kana ekot itunga aite engarenon lo ebuni ajakun ationis ngin,” abala Okello.
Stella Iyatu na elomunit ko Agwara ngesi anyunyura noi ebe, ebuku loko Serere kitiriani keda ebuku lo Kasilo nesi erai lo ejai aitegelikinet na epol noi konye kojaasi keda engarenok lu eriakasi kobala ebe, kowai lo angaleu emamiotor ebuku lo Kasilo keda adekis na itekoro.
Kotoma okisila, ebeit ebuku kojatar ka adekis na adoketait naiwongonet kede esomero lo etatai.
Erai ngin angarany na ejatar ibukui lu ipu ko Teso karaida icurosi itunga ebe, apukonor ibukui icie.
“Itei ijo adekis na Apapai. Ememei abeitonut kotoma cut naarai erai adekak nu angor keda ikiliok aimor ediope ewoodi. Ekoto engarenon lo esekunio apele cut arasakin aite angaleu,” abala Iyatu.
Gabriel Opolot, ediope k’aseak ngesi etakadikina noi kanu ejautene lo isomeroi kobuku kobala ebe, ejautene lo isomeroi ngesi erai lo imokococ.
Abala Opolot ebe, isomeroi nu ipu kobuku kesi ejaasi keda ekadakada lo epol noi kitiriani keda idwe nu ejaasi osomero keda kowai lo iboro nu itosoma.
“Karai erai aikeun ebuku lo Kasilo ekoto engarenon lo etubi aseo naka 2021 kopedo aite ewai lo asioman. Emamei ber ne eperete esisianakinak icie da ibore yen itakalanyit kesi aswam kec,” abala opolot.
www.aicerit.co.ug | Na Ewadikan Aicerit
Kobuku Kasilo erai Elijah Okupa lo obonipe, Fred Owanyi, Moses Edonu kede James Emaju kejaasi icie da kesi iteunitos ebuku.
Okupa nesi kwana adau ikaru 20 ijaanakini omakuk ido ajai opate loko FDC eroko ikerikina abolobol kwape obonipe.
Kangin abwaan, icasit aimo abootin kinera akiro nu irotin, angaleu, asioman, apetor ibakor kede iboro icie lu etamete aikeun amuno kane ejaasi itunga kede alosit aikwet eraasi 14.01.2021.
Kosabiiti lo atubor, abu Emaju lo eboloboloi kanu ainemakin omakuk.
Kwape kalucie, abala Emagu ebe, amonyata itunga luko Kasilo ido ekot kesi aimorikikin kanu asekun engarenon lo itekoro kanu adukun Kasilo na itetet.
Abala ebe, iriamara emanifesto ke ka aimony na itunga.
Eyatakit ailip aseak nu kobuku Kasilo apalar adodanar kosodete asesen abwaak kere kanu asekun MP lo ibusakit ebuku kobala ebe icie itunga kesi kwana alomakisi abolobolok aitolitol aomisio kec aitaraun nu egwelio amoromoro icie abwaak.
Karaida ewola Emaju konye epelu loka MP nesi aiger ikisila, aimaniman ainapeta nu apugan, atiakataik emugaati kede abwoikinit itunga kairabet. Icorakitos ipiriotin aseak araun lu epiriaka esekete.
