TESO – Nepe elimoria apolokiton nu aseo opate loko NRM ebe adol kere apak na abongor adokio akanin ne ejaasi aseak, koduosi MPs itauon rut. Naarai lu ipu ajenete ebe mam bobo eminasi kobongutu aidukula asupu kwa lem enaikitotor owooteerin lu cokom. Apol elalai ka aibwonga kodisete egangitok kangin idiopet idudeiki kunnyu-kunyasi ebe erai kwana kesi atiakun imongin kane ejaasi itoba. Abuko aboola ka akiro irienguni bala emoyo lo agayon aremonokino ne ejaasi aseak. Kobuku Serere edonaritos Philip Oucor ka Bp Patrick Okabe, aiyaya itauon aseak ido kitoporete aboola kourupete aseak kosubite bala imodialan lo ikamete enaka.
Abu Oucor oketu 18,751, ailanyara Okabe lo adumunit 10,302 ido abu Samuel Otaala, kongilu 545. Ne iriamakinos ikesa lu arai apua edakun irienguni bala eriamata itomei. Kobuku loko Kasilo ne abolobolotor George Akuwan Owanyi ka Edonu Moses, mam akiro apataka naarai amwaka iboro. Ajaasi amariaun emeedera loko NRM kanu apetokin ko Elijah Okupa ka Emaju loko FDC.
Ilanyakina lu kede nepatai abootin 50 bon. Edonu ngesi abu kodum 4,637 kosodi Owanyi adumun 4,583. Ebuku Pingire nesi ejekor Fred Opolot ka Joseph Opit Okojo neda aponi kitamaseere Opit akipi nuko Pingire. Ido ne ewanyuna emeedera lo doos era aketun adai kobala ebe ibwapit bobo ngesi Opolot. Abu opolot kodum 6, 768 korwetuni Opit 3,788.
Mam ber adio abwaan na abu koyapik abolobol kede MP na ebwoitkit angor ko Serere, Hellen Adoa, apolouke ebe idonaritos Opit, Okabe, Oucor, Owanyi, Opolot ka icie kojai Adoa alopet aiyet acece nu aporoga nuko Serere. Naikanyet kobulo do etuo kodetunos amug kinga apolouke ebe kidetakin ijo ecokot lo adwaran kojen ijo ebe asang aiman.
Inyobo atubio Oucor kosodi Okabe ka Otaala aibir akwap?
Kwape ebalare ebe erai aseo abolia na modok karai ikam aimodimod ijo erai aipwokun bala ikoku yen ebolia korit. Obuku loko Serere, arai abolobol kidding Oucor lo abalai ebe engoorit ka BP Okabe. Konye nu aumokin abu engoorit kibirio Ebishop akwap kede iliiban kere. Itunga luko Serere lu atupakitos akiro nuka aseo kana komam ekotosi ikiroria kibeliarai kesi abalasi ebe mam akiro apataka naarai kowai lo abola, abukete iwaitin kere. Eyatakitos ebe aitub ke Oucor elomunit naarai pac abu kitegea aigangit kesi kede iboro swi kwape nat iwemai, apiyai ka icie karaida iswamat Okabe ngupengun konye bala apotu aseak aomisio korioto.
Apapulai
Pac ne abwoitotor Bp Okabe ka Justine Akutta Olupot, abu Ebishop kidorok akeju ne ajai lo epolokit aseo nako NRM (2016), kilipite kitobwounai Akutta mam abolobol naarai ebe epu imusaagon, konye abu Akutta da kidorok akeju, oyapesin luko NRM, ne aponi kocamakinere aibwo. Konye abu Okabe kodum arereng kwape abu kitolitolio oupake toni aitub kwape MP. Ailanyar Stephen Ochola lo asubit bala abu akim kec nako FDC kosilio. Nepe eroko Okabe icuro kwape MP, abu bobo Opio Linos loko UPC, lo abwoitos kakesi kosodi airanyar kodaka Okabe adieket, kanu ebe amamut ka apapulai nu asioman. Omusaago lo apupio ko Soroti abu atubon Justice Billy Kainamura, kikisara aseunio ke Okabe naarai ebe mam ejulit ikiroria ke ne aria ber Oliba Patrick, konye abu kijulira ne abu Justice Steven Kavuma kitogogongio aseunio ke.
Bobo nepe edoli abolobol, abu bobo Okabe kidorok akeju ne ejai Tanga Odoi lo epolokit aseo ko NRM, kilipite ebe kikisarai Oucor mam abolobol naarai ebe mam apapulai ke nu asioman arioro ibore abu koyau aumuumo ne ejaasi aseak kobalasi ebe edolit bodo aikisar kesi kere naarai ajai ationis apapulai kec.
Nepe ipupokit kolomunete akiro nu etoronitor Otaala, MP Okabe kanu ebe aibunga ngesi ka ebe alosite aswam asubanit orute ke ibore epegit Okabe. Imarakitos bobo ipiriotin icie aibiror ke Okabe akiro nu aijaanakin kairabet. Eitaabo lo airabet lo ikamere akiro, nesi itodunit ebe agear ne alomara Okabe airabet, mam egetaritor eporoto ikaru iuni kau. Itodiei nen ebe esubit bala abu kokadak itunga naarai mam iporotoi kec abwoikitai kairabet kwape eraar epelu loka Mp, karaida eutaara Okabe ka aitopol Serere.
Kiwany ijo owai loka aijaanakin, eripoota lo alacunio pac, nesi bobo edodit Okabe ebe arai lo asalana airabet adepar. Apolouke ebe karai esalana ikoku atukot mam emisiikini iboro lu inyabukaete imwalimun. Ko Pingire abu Opolot kowany Opit kodakari ameedera. Ipu iboro lu esubitos bala apotu koyautu aiswelaor ke Opit.
Ne araar apolon eicolong LC5, ajaasi Opit kede imusaagon lu alupok, aitukurian asean kede emuudu, aigurugur atiakuno na itaunin ka iboro icie. Apolouke ebe arai ngin arereng na itunga aiputar imoyo yeni aronon ko ‘Ejalijal edupori Okabe’ Serere.
Opit ngesi itoosatai kanu amumu akaulo na ebe aitukurian ka adodikin Samson Enyuku emuudu ibore ebilit atutubet na ekisil 32 (1b) kabunget na ikisila luko Uganda.
Emusaago lo nesi adepa ekaru eperi afairo enaba 190/2019 CRB088-2018 ido Opit ngesi aponi kitobwoi okooti atenak swi ido erok emusaago ke elosi akonye.
Kowai lo eijaanakine mam Serere ne araar Opit ecaman LC5, esomai ejok. Itodunitos ebe Serere distrikt nesi da abu kikwadakin onaaba lo 77 kede amakesin 65 kitirian kede 91 lo asipor okaru lo atubor k’ amakesin 51. Apolouke ebe acoikina aseak aijukar Opit airabet naarai emina bobo Serere kosal erukosi kede imala kowai loka aijaanakin.
Kowai kalo Opolot, esubit bala amwatar ainyinyir naarai apol lem look airimokite, ketam aibwo ko Serere, aria aimat akipi, ketam alomun Soroti Municilapiti da abu kidediar akeje kwap, esubit ngin bala erai aitim ngesi.
Ko Obuku loko Kasilo karaida arai Owanyi ogesek kwape abwoitor pac okaru 2016, mam aseak apotu kocamutu aipup nuke kobalasi ebe mam nu etetiak abeit ngesi aisomakin kesi. Apotu kitojokata asekun ajanit naitetet naarai epieete ejok. Konye Owanyi ngesi ber eroko ingitanar nu ebeit atupakin konye adau oupake aidolakin erodi toni kuju akongin. Abala ebe ekot kobongokinai aimar aseeta naarai ebe abu lo epolokit aseo kitosoma esimu atukonokina abootin aiboisit na aitosoma acuuma na etukere.
“Acamunit eong ebe karai ebongokin aimar abootin kodoco ideleleuni ebe elanyit eong Edonu kede abootin akanyauni kong,” elalai Owanyi. Opit lo eroko agweeret enomorit ngesi mam nepecep ecamunit akiro nuka aseo kobala ebe ebuni aibwo kwape obonipe naarai apol akoko kaseo.
Okabe ngesi abala ebe mam ngon erai eipone lo lem itolosio NRM aseo naarai toni idwe da acamakitai aibwo okokoro ido apol akoko noi. Adelorit ebe aponi kiwadikai imeeba luitetiak apaaran na aseo, ido ebe mam aseak ka esomak luko NRM apotu komisiikisi ebalua ke President Museveni lo erai ecaman lo epate.
Elalai ebe mam bobo imeeban luko NRM lu ocaaloi aponi kitogogongoorai, ido ebe apotu ipolisin ka ajore kodemakisi icamanin lu ocaaloi epelu kec. Konye epegasi lu kere ebe ajaasi aidar ayuara. “Mam eong acamunit ebe elanyitai eong ido abuni aibwo kwape obonipe, ido mam ekoto idio itunganan alakanar,” ekilikila Okabe.
Abala ebe eroko ber ngesi imadi aromwa ka aingitanar egangitok ke ido nu elimunete kesi nesi epote aisomaun. Konye Oucor ngesi elairai ebe elosit aseo kodoco ido ekapakina aiketakin yeni iriikin ingaren ke kede abotet na abootin kedolu ekaru 2021. Opolot ngesi ekekemo kobala ebe mam nu ipu ekoto ngesi aida. Abu kitur aseak ke kanu aikwet kodoco, kobala ebe mam abootin kec elositos awai cut.
