SOROTI – “Konye alimokini lu mam edukokina ka apuserun da ebe, ejok kamakec arai esalito kwape ka eong. Konye karai mam epedorete ayaikina bonik, kodukokinos naarai ejok adukokin itia ainok,” inera Ebaibuli kotoma oitabo loka Ikorinton 7:8-9.
Esubit bala ngun kesi etupakit lo kolo arai Aanyanaran loko Soroti Diocese, Charles Benard Obaikol Ebitu.
Arai aumokinet ne ejaasi Ikuristaayon akaulo apupun ebe, Papa Obaikol ngesi bobo abu kodum ameduk acie ka ainerun aimany ngesi.
Naesabiiti kosabiiti lo atubor nesi edulokinotor akiro ngun asipokin otauon luka Ikuristaayon akaulo eyaitone lo ekanisa, aitodiar Papa Obaikol kede amaaran ke na itet.
Aponi koterakinai Papa Obaikol ka Caroline Martines Akiror ingaren na elutaari irwan nasodit kanu aingitun ibore idio yen isimiki kesi adukokin.
“Ejai idio itunganan ne yen ejeni idio ibore yen isimiki itunga lu adukokin kwape ekiliokit ka aberu?” engisit abwoikiton Bishop ko St. Peters Cathedral COU, Naphtali Opwata, kitoikitos itunga aki kopol Papa Obaikol aikweny emuceera bala etaakit lo abu ecokon kopalik anakar esurup kere.
Emamei ber idio itunganan yen abu kolimor.
Erai Akiror na edolit nepetai ikaru 40 auriat nako Katakwi ido Luther Ikwap kede Angella Akiror Ikwap kesi euritos ngesi. Erai bobo Akiror inacike Alfred Aruo lo kolo asai Soroti Municipalite kwape Emeya lo abu Paul Omer kipunupun ekaulo kaseo.
Papa Obaikol lo abu kiyeng kotoma aswam na ayait Aanyanaret kokaru 2009 akaulo aidar emakuk ageun okaru 2001 ngesi ejai aimany Akiror akaulo aberu ke, Toto Ann Margaret Obaikol atwanare eraasi 7.04.2021.
Papa Obaikol lo elomunit kocaalo Abalang, Anyara ko Kalaki distrikt ngesi ejai aimany Akiror korai lo ikaru 78 lu akusiarit kokwap akolong.
Papa Obaikol ngesi ber ebuni araun Ebishop losodit aimany bobo akaulo aberu ke atwanare, ibore yen ebuni aitodikin lucie itunga da ebe, emamei ationis etunganan aimany kotupite nu inera Ebaibuli kodoco.
Edaunitai aitemokin Papa Obaikol ka Akiror aiwen epeta ko St. Paul COU ko Katakwi eraasi apaarasia 16.07.2022.
Arai Obaikol Ekaanyanaran loiunit aisa Soroti Diocese akaulo aburokin loatwan Papa Geresem Ilukor, lo abu emun koyar.
Abu Papa Obaikol kikopak Papa George William Erwau aboko na kwana esipo akanin ke Bishop Kosea Odongo adaun ikaru iuni.
