KUMI – Ajore ka ipolisin okapitos apopongo, kesi Naebalasa aponi oremorai adekis na Kumi ko Ongino akaulo na eswamak lu adekis amumuor toni agolokin erute loka adekis kotupitete ebe eiswamae lo aronon lo itosomaete engarenok lu apolok adekis. Eswamak kesi itoronitos Robert Olupot lo epolokit adekis ka Gorge William Omoding lo eyait nu ikisila kanu duc ebe aimikite kesi adumunun eropit kec nepepe ka amukian ebe naarai epol. Abalasi ebe iburai kesi Margaret Asire adiopet eswamak 28, lu ekotosi atacio ido ajaasi kesi ber aitemokin ationis ngin. Asire ngesi itoronit eyaitene lo adekis kanu ebe araut lu mam ejenete akec aswam kaacut koipone lo ebe akote ebe ajaanar kede apesur ka angor nu epote aimo aswamisinei toma adekis.
Joseph Odwar, engwalas lo inyolai egaali korai asekan agasia adekis ngesi abala ebe ipu ican ejaasi adekis. “Erai ijo aswam isekelete, konye eraun aitac ijo erai aitasonitoi, okwe ikote bo ai itauon itunga kalu ai?” amonyi Odwar. David Okurut ngesi abala ebe mam kesi ecamakitai aikeun adis aimony kotoma adekis icikakitai kesi kwape icikakina aberu imukeru kotoma akangas.
“Kolim akiro itwania aswam mam isio ne ejok cut ido mam eyuara kanu eswamak,” abala Okurut. Joseph Albert Okello lo oitela lo Acaboi ocaalo lo adekis, ngesi abala ebe kwape itunga lu eraasi idunyeta lu adekis mam kesi iyalamasi keda nu iswamasi kotoma kobala ebe ageun ne anyouna Dr. John Opolot toni lolo agir eswamae lo adekis nako Ongino aiten. Eyatakit ebe itunga lu ejaasi adumun amukian kesi apotu obelunos aikenyikeny akiro alimonokin Omoding ateso otupitete etiai lo isirigin lu ekwamanakinio adekak.
“Kopekwana ingisitai eong sh120,000 kanu apaarasia aarei konye mam ber isio imuketai bian,” abala adiope aberu na edari adekan. Dr. Robert Olupot ayaiton adekis lo itoronitai ngesi mam abu opedo adolun toma adekis ido esimu ke ngesi abu ililing ido Omoding lo eyait eswamak ngesi akotosi itunga itonyounai katipet nepepe keda Dr. Olupot naarai eutasi aibiror adekis koipone lo alemanar eswamak icie ido ebe ayaunun ipajanakec.
Omoding ngesi abu kogir alimonkin lu iyemuto akiro kobala ebe amameete nu etemari ngesi kangun kere naarai amamei ajenanut kotomakec. Rev. Charles Okunya Oode, lo ingarenikit ekomiiti lo eyait adekis ngesi abu kilip itunga adumun atiting kosodete ainakin ebood apak na esabiiti ediopet aireikin akiro nu ekeutu kesi kwapenat iboro lu eomitos kesi ebe iritonorio kotoma adekis akiro nu angor itunga ka ikapun lu ipu lu ebalai itatacio adekak.
Abu ocam ebe acie kotoma akiro nu ekeun ejaasi toma oripotan loka ebood sek. Itunga kesi apol aiweweanakin akiro nu ebakare ebe Omoding ngesi edauna apak ke kotoma oyapesi ageun olap lo ikanyetauni konye eroko je euruma kotoma konye mam ber kidumunit aitogogonget kotoma obood.
Polis nesi abala ebe ajaasi kesi ngina kanu ainakin ayuara karai ejaun amumu konye mere ayuar idis itunganan naarai ecamakit ekisil idio itunganan atodiar angurian ke oipone lo inapaara. Adekis nako Kumi nesi ber na abelar amukian kakaere ko Teso ka Uganda aimoriarite, ido erai aiyalolong ebe egurokin eyaitone.
