PALLISA – Aseo naka apolok icolongo luka itemwan (LC3s) ka ikansilan kec ko Pallisa nesi igurokin kedol esawa lo alimor abwaak lu apotu kitelekasi aseo. Kadukena nu Pallisa distrikt, arai aikoler aikweny ajaikina ne emarere aseeta.
Amumu ka aijuwanar nesi abu koterun akaulo na ejakait Kinbowa Erasmus lo ayait nu aseo ko districkta lo Pallisa alimor Yusuf Zomu kwape etelekaran lo emakuk loka LC3 kanuka Pallisa TC, ibore yen abu koyangau aingany icop ka adodanar kama ejaasi egangitok ke Ben Okiria ka Ali Ogogol nu araasi icie kotoma kangun nu abolobolok.
Nape elimori Kinbowa, Zomu kwape etelekaran koduos egangitok nu engaitos ikela kere kuju keda ariengun itoronitos Kinbowa Erasmus kwape lo abu kitolitol aseo naka LC3 kotaun Pallisa.
Abalasi kwi ebe, arai Ben Okiria ngesi engarenit kotupite Ali Ogogol kogoli Yusuf Zomu kotoma apak na atukonikinatar aseeta kec eroko erionget loka aseo alimoro etelekaran. Abu Kinbowa kolimo Zomu Yusuf (obonipe) kwape lo adumunit aseeta 3,657 ido korai etelekaran ailanyara ipaupa ke Ben Okiria (obonipe) lo abu kodum aseeta 3,373 ka Ali Ogogol lo abu kodum aseeta adis.
Mam akiro apataka naarai apotu egangitok ke Ogogol kede Okiria kocuriasi abongonokin eswamak luka erionget lo aseo, ibore yen abu kijaiki nu ayuwara kingarenikite atupiton RDC kodistrickta lo Pallisa, Dhikusooka Magidu icorakinete erionget loka aseo kodistrickta lo Pallisa aikopar aseeta kanuka aseeta 32 nu ejaasi Pallisa TC kanu aikopar adieket.
Ogogol ngesi etoronit erionget loka aseo kanu alimor etelekaran lo abela ngesi ebe, mam atubit kobala ebe, arai ngesi nesi ti abeit alimor konye abu koraun na aumokin apupun elimorio Zomu.
Okiria ngesi anguriani noi ebe, aponi kolemunai isirigin kanu alimoro Zomu kwape etelekaran, ibore abala ngesi ebe ekoto adieket apupokin aimony kec kodoco.
Eja ngun da Zomu Yusuf lo emonyere ngesi emuwarit ngun kere kobala ebe, mam ngesi elomunit edio enyadu kere kanu alimorio kwape etelekaran. Abala ebe, arai aseeta kesi apotu ikidiokoto kane ejaasi ipaupa ke.
Konye ejaasi abu Aicerit kotam akodakin kede Erasmus Kinbowa lo itoronit kanu alimor abwaan lo ebalai ebe mam atubit, kanu adumun akiro kaituk ke konye mam abu kopedor.
“Mam ber kopekwana eong apedori einer keda nu iyemuto konye esumunikit ainakin einer ka ekaulo,” abala Kinbowa lo apalipalit. Icie kotoma apolok itemwan nu apotu kitelekasi aseo kodistrickta lo Pallisa kesi imoriaritos; Olok-Paul Omuron kotem Pallisa, kotem Kamuge arai Victor Okwajja ngesi abu kiliko kopetuni Samuel Mukula da etem Puti- Puti. Kotem Bolliso One aria Richard Otwao, Ronald Kolere kotem Kasodo ido ko Kamuge TC abu emakuk kobe akanin ke Debya William.
Icie kesi Bosco Opolot kanu etem Kibale, kotem Opwateta erai kwana Ben Amukikin ido ko Kibale TC arai Joseph Okoboi. Mam etem Kameke da abu kisimik Vincent Okurut emakuk kosawan lu ejaikina etem Akisim, Ambrose Okello. Kotem Agule, abu Robert Otaget kotub, John Bosco Okolong (Chelekura), Vincent Acoroi Mudala (Obolliso), Yosamu Okoyo (Gogonyo), Emmanuel Olupot (Apopong), Kenneth Mapera (Obutet), Joseph Solomon Okanya (Kaukura) ido Simon Okia (Agule TC).
Kodumak aidules acie otoma apapula!
