KATAKWI – Alupok nu ejaasi otem Okore ko Katakwi kesi iyatakitos aikud itunga itauon.
Kotoma aiboikin na ekansulo eraasi 11.03.2021, apotu bobo akiro kiwelunos, esubit bala ejai aipimao na alupok nu edolete 12,000 elosi kotoma amutonu.
Erionget lo itiang luko kitui Uganda Wildlife Authority kede iriongeta lu ebokete akinyet kesi etoronitos ikansilan.
Simon Ecuman, ekansila lo kotem Ongongoja ngesi ekeunit ebe acuman kesi igononoete kotemwan luko Katakwi aipima alupok nuka itunga.
Ben Egau, ekansila lo kotem Getom ngesi etacaunit ebe, epimak lu alupok ko Katakwi kesi ekodakina keda itunga lu apolok ko distrikt.
Engurianete ikansilan ebe, mam erionget loko UWA ebunit apesikin akiro nu alupok kangun okansulo konye komonyete itunga kotem Magoro ebe, ejakai aipima alupok kangina.
Seraphine Alia, apolokiton ajakanuto ko Katakwi ngesi elipit ebe, edolit ekansulo anyaraun UWA.
Simon peter Ojaman ekansIla kotem Usuk ngesi anguriani ebe, ejalakitos, apolokiton ajakanuto, apolon eicolong loka LC5 kede RDC, ekansulo mam ejeni ainwakio na akinyet elosi akonye.
Elipit Ojaman konyaraunai UWA abunore okansulo aitacaikin itunga akiro alupok nu itiang tetere ejenuno ne ebeit UWA .
“Ikoto isio Museveni da abunore aitacaun akiro nu alupok nu UWA nu kotem Magoro. Apas isio,” akudiani Ojaman.
Charles Aleper ekansila lo kotem Akoboi ngesi elipit apolokiton ajakanuto aitijenikin ekansulo isirigin lu edumunit ngesi kane ejai UWA.
Koiner ke, Seraphine Alia, apolokiton ajakanuto ko Katakwi ngesi acamunit ebe, ejeni akiro nu ainwakio na akinyet kotoma alupok nuko Katakwi.
Etacaunit ebe, adumunit ngesi ebaluwa korionget kangon ido ikanselan lu itemwan lu ajai ainwakio na akinyet alosit akonye kesi ebe, aponi konyaraunai.
Eyatakit ebe, emameotor apolokiton ajakanuto kede apedor na agwelar alupok.
Eraasi 5.3.2021, erionget loka isuban edeke keda ibokan nesi abu kitegea aipima akinyet ko Katakwi.
Alosete ainapeta ngun kotemwan luko Okore, Palam, Magoro, Okulonyo, Ongogonja keda aboisio acie nu Omodoi.
Kwape ejatar akiro nu alupok idukuritos aki nuka aseak, aipimao komam itunga ejenete nesi icumit itunga itauon.
Betty Abur, egirigiran ka etatai kokansulo ngesi abala ebe, karaida elomuinitos luko UWA akiro nu alupok konye kitoni lolo, mam edistrikt ejeni ne ejai eikoru lo Katakwi keda Karamoja.
“Agear na ayaunere amaapu na alupok ko Bulaya, eroko amamus na ayuara idopit,” abala Abur egata.
Eyatakit ebe, erai abeit ebe, aponi konyararai ikansilan lu kotemwan luko Palam, Ngariam, Magoro, Omodoi , Okore kede Ongongoja kesi aponi konyararitete. Abala ebe, erionget lo ibokan nesi anyararit kesi.
John Stephen Ekoom, RDC ngesi abu kolimokite itunga kotemwan lu imarunitai ainapakin kojalakisi ariengun kede asurokin itunga lu ejaasi aitolot ainapeta naarai ebe, ejeni eyapesi ke.
Abala Ekoom ebe, ekodet lo ngesi ejai airere aiboisio nu akinyet na inwakunitai ayoun ko Hoima.
Eyatakinit ebe, ekodet lo nesi ebunit airiamun keda itunga kotemwan alimokin ainapeta kec nu apugan.
Ekoom ngesi abala ebe, karai kinwakun akinyet ko Katakwi, imedaikini edistrikta, itemwan keda aiboisio nu adumakitai akinyet.
“Mam eong aomit bala aipimao na akinyet bon elosi akonye. UWA da ejai toma. Ationis na epol, enyaranario ikansilan idis lu mam ejatar keda aijen na apodokit itunga,” anguriani Ecuman, kobala ebe, ebuni ngin atwarun amumu.
“Imedaunete itunga kowai lo adumun aswamisinei, kosi edistrikta da imedauni kotoma oipongut lo ebuni ayangaun apol,” abala Ekoom.
Aibodo adolo akiro nu Okore?
Akaulo na eiri lo epol noi kanu alupok nu Okore kwana ikaru 9 agear ne epimaire alupok nu okaru 2012 esalit ajurungungit eroikit ekansulo.
Ekansulo kotoma airiamun na ajaikina eraasi 16.10.2020, kigarenikite Francis Okwameri, eraban nesi abu kitobwou ainapeta ke Joseph Akubal nu aipima alupok.
Aponi kicorakinai ngesi aisac aswam idio ibore kere yen ekodakina kede alupok ngun. Aboikin na ekansulo eraasi 11.3.2021 nesi abu apolokinton ajakanuto Katakwi, Seraphine Alia , kolacuna ebe eraasi 24. 2. 2021 aponi kijukakinai ngesi abaluwa na inyakakitere itunga alupok kec.
Abala ebe, erionget lo alupok, itogoi kede apol ngesi abu kijukak Katakwi distrikt abaluwa ngin.
Eyatakit Alia ebe, edodor erionget abunore aikopakin itunga luko Okore alupok ngun.
Margaret Imalingat, akansela na Okore ngesi abala ebe, nu eswama UWA aipima alupok ko Teso kesi mam ikansilan lu ipu ejenete kitoni engarenok lu adoketait nako kwap.
Imalingat nesi ecamunit ebe, kariada kiworonit erionget lo ibokan kesi konye epol abuinikin.
Abala Imalingat ebe, idarekitos itunga lu kotem Okore adumun apapula na inyakakitere kesi alupok.
Eyatakit ailip lu ayuara aingarakin adiekun itunga kane ejai amumu na eroko ekulai kotoma aiboisit.
Kokaru 2019 eminsta lo cici loka eilatok, Godfret Kiwanda ngesi abu kipejoikite Katakwi airiamun keda engarenok luko Katakwi eraasi 18.11.2019 kanu aitemokin eidicane lo itiang lu aisu lu apotu kobelunos.
