KUMI – Erionget loka Korea National Information Society Agency ngesi, kosabiti lo atubor, abu kijukak Kumi Unibasite akomputan nu itetiat 100 kanu aitokaaria asioman na atinen kwana naka olago.
Akomputan nu kesi itorunitere toma Korea embassy kane ko Uganda luda apotu ikopakisi akanin nuka Vice Chancellor loka Kumi Unibasite Dr. Se Kee Hong.
See Kee Hong ngesi ebala ebe, erai na ainakinet ne ejai eunibasite tetere aikeun asioman kowai lo aitosom akomputan naarai apaarasia nu erai asioman na ejulakin araun na epol aitosom elago ajenuna iboro luipu
kotoma aingic, asioman na olago, eiitabon lu olago na ekoto ojaasi akomputan nu edolitos kanu esisak keda esisianakinak kere.
Abu kiyatak ebe, kwape lu apolok esomero etamitos kesi nu pedora kere aanyun ebe, epololoi Kumi Unibasite kotoma asioman araun lo ilaagani keda isomeroi ice kotoma akwap kere.
“Kijai atamit nu ipedori kere ido idau akapakin kanu apukor asioman na okaru kalo karaida ejai adeka naka Corona. Kidau asipokin nu
tupitono idarit bon apugan angaikin” abala Hong.
Dr. Okodan Akwap lo erai atupiton lo apolon lo Unibasite ngesi ebala ebe,
abunera naka akomputan kanu adau do aitapatan aswam kec keda ainakin
eunibasite adumun abaluwa naka Charter na ipuda esomero aitodolikin aitoduun ebe erai esomero lo adoketait nako kuju kanu asioman ka ipudar erionget loka apolon lo eyait nu asioman na adoketait nako kuju ko Uganda (National Council for Higher Education) NCHE.
Kodumak aidules acie otoma apapula!
