TESO – Akaulo na ilapio ikany ebuonokinos itunga luko Teso kanu abaagat na iyemuto, akaulo na agolokinere apapula na Etop, emiliau Aicerit! Itunga ka engarenok lu pac apotu isio kadolokisi alimun adis nu ikamunitos amacaruno na apapula acie na Ateso kane kesi apotu kijaututu Aicerit jokan kede itauon ka amuno kec kere. Emuriemuriasi, kimiliasi ireetin kede aiyalama kanu idwe Oduk aibumakin aitolomun apapula na ebuni aisisianakin, aitijenikin, aisial ka aitopol ateker. Kede ailel na epol, apotu engarenok lu adokena nu egelegela inerata Ateso nu eposik kanu Aicerit!
“Erai Aicerit ekiror lo egogong ido lo ejijim. Ibecokina asekunio naka ekiror loka apapula kana. Epol eong aiyalama naarai alomu bobo apapula acie na Ateso kanu aingarenikin Teso aitup erot lo idererei,” abala Bp. Rt Rev Dr. Joseph Eciru Oliac lo atulik ko Teso, koyapesi ke. Abu kicorak eswamak luka Aicerit aitodolikin epelu kec kiitunitos apolou na ekiror loka apapula.
“Kijautu Iteso, kigangata ido kilipanakisi apapula na kanu aitopol ateker,” abala Bp. Eciru, kimuriemuria noi. Eyatakit ebe, elomunit apapula kotoma apak na etereikinatar akwap kede ationis na adeka naka Ekorona, ido ebe ebuni araun arereng na epol Aicerit aingarakin aiwe iponesio lu etupete itunga kanu ainac aikatun adeka ngin.
“Eyalama anyaar adam, apwakun apapula na ebuni aisa ateker. Ekot Aicerit ngin kowea iyemuto lu elaete. Kosipokinos toma apeleikineta nu idukunitotor yesi apapula na,” ecori Bp. Eciru apwakunak luka Aicerit. RDC loko Soroti, John Stephen Ekoom ngesi abu kijau Aicerit kisumunikite aiswamanara jokan kede eswamak luka apapula.
“Erai arereng na bamar ebe adolu bobo apapula na Ateso ido korai na itolomunitos idwe lu ore. Epol eong alakara,” abala Ekoom, kimuriemuria. Eyatakit ebe, edolit aitolomunio na apapula naarai toma ke nes edumakinete itunga akiro nu ikamunitos ainapeta nuka apugan nuka apol.
Abala ebe ebuni aipucakin abaagat na asioman, angaleu, aicurus kede akoru. Kwape eraar Aicerit ebur loka iyemuto, abu Ekoom kisumun ebe, elosi ngesi aiswamanar kede apapula naarai ingarakini aweanar ainapeta nu apugan, ibore yen erai epelu ke kwape abwoikiton apugan nako kiding ko distrikt.
Elakuni akoriok
“Kwape erionget loko Teso Cooperative Union, ijaunit isio Aicerit kede akanin kere naarai imuno ebe ebuni aitopol Teso kowai lo akoru,” abala Alex Okwi Okello, apolokiton nu apiyai ko Teso Cooperative Union, ijauni Aicerit. “Mam eong atwaniari ayaun aomisio nu icorete akoriok naarai adoo Aicerit. Erai kwana akoriok aitwasam arereng na adolu kanu apetor ibakor,” abala Okello. Eyatakit ebe, edolit akoriok aigang apapula naarai ebuni awear iponesio lu akoru na apaarasia nuka lolo lu imedaete.
“Arai lem ajurungun na epol emamei apapula na iyemuto luka Ateso. Kowai kangol, ejesara eporoto lo akoriok naarai amamei eipone lo apedoroto adumun iyemuto lu apote aingarakin kesi adumun acoasinei nu apetor ibakor,” abala Okello.
Eyaitone lo apapula ngesi esumunikit aiwe iyemuto ne ejaasi akoriok kanu aimedaun
kotoma akoru k’oipone lo aipit ka akoru iraan.“Edolit kwana akoriok alomar toma atukono nu epedorete aingarakin kesi agwelar iraan kec kitoni osokoonin luko kinga. Ajeni eong ebe, epedori apapula aitolom aomisio kede arucokin ipiriotin ne ejaasi akoriok kotoma aiboisio kere,” abala Okello. “Kwape erionget loka Teso Coopeative Union, ibuni aiswamanar kede apapula kanu agwelar ikorion luko Teso toni aiboisio acie nu ejai esokooni,” esumunikit Okello.
Eleli ekanisa
Ebishop loko PAG konyakoi nako Teso , Mathew Omagor, ngesi esialamikit aomisioit naka aipopoun apapula na ebuni aisa ateker ido korai idwe luko Teso kesi epwakunitos. “Aicerit apolouke aica. Atakanu do kotenan ebe adolu aica Teso. Itodunit do na ebe ejaasi kwana Iteso lu eomomoete aitacaunun icie koboro lu ejaasi naarai kotoma abeit ipuda oni iboro lu epedorete aingarakin Iteso ajenun ejautene kec,” abala Bp. Omagor.
“Kisirereng Lokasuban apapula naka Aicerit. Elipi eong nu okiror loka Edeke Papa, Okoku kede Edeke Emoyo Lokalaunan. Amen.”
Eyatakit ebe, atiokisio acie nuko Teso, itemokinos kede aomisio nuka ore. “Ailipa ka bon ebe inyekikinai agolokin bobo ngin da naarai esali do ateker emameotor kede ibore yen ingarakit iredion kanu aikwenyanar itunga,” abala Bp. Omagor.
Erai aminat
Icurosi aramak
Iyalama ateker
Kodumak aidules acie otoma apapula!
