KAMPALA – Kanu amengit ikisila lu itolomunitai lu alosite kuare, ipolisin ko Kampala, kesi ebeliasi
ebe akacutu kesi nepetai itunga 2,124 kanu amengite ainapeta nu epesikitai nuka Korona.
Erabasi kalu iyemuto ko Kampala, Naebalasa, eraban ipolisin ko Kampala Fred Enanga, ngesi abala ebe ajai atupakite nuka Korona nu epesikitai, konye mam icie itunga apotu kotupakisi ido apotu kipokata.
“Apotu isio ekamasi itunga nepetai 2,124 ka amotokan nepetai 405 ka 2888. Itunga lu ikamunitaikesi ebeit aitobwo okooti ido amotokan ka ipikipikin kesi ebeit acilakin arisitin kanu aitac apiyai nu amengeranut,” abala Enanga.
Eraban loka oibuga lo Kampala, Luke Owoyesigyire, ngesi abala ebe nepetai itunga 700 kesi ekacunitai ko Kampala bon kanu amengite nuka Kovid.
“Enaaba lo epol kakere kesi ikamitai ejaasi obaan ailik akipi ido ido icie kesi etekerete amotokan
kuare kilurasi ejuge. Ebeit kesi kere aidedo okooti kanu apalunite akiro nu eyangaunete akorio
naka ekorona,” abala Owoyesigyire.
Apolokiton ipotoloi ko polis Edward Ochom, ngesi pac abala ebe, ikomandan lu ipolisin ko Uganda kere, kesi edaunitos kesi aisiirikin akiro kanu aisiketikin akiro nutupitono nuka Kovid.
Abala bobo Enanga ebe etamitos kesi aridakite etekerak amotokan kwape nat abaasin, taxis kanu aricakin akiro nuka Kovid.
“Idau isio aisisiaun ebe apalutu itunga adeka naka korona, ibaan kesi engaara, abaasin ka atakisin, kere ilelebe itunga pas, ido itunga da kesi mam elaanakinos iboete, lu ipu mam enapitos amasiks ido icie kesi mam itosomaete esanitaisa,” abala Enanga.
Kopukwana, Naesabiiti aponi kodumunai itunga nepetai 690 kotoma itunga 5,166, kesi adekasi ekorona, erionget lo angaleu.
Kanen Kampala, ekeuna enaaba toni 415, Wakiso 88, Moroto 49, Tororo 25, Busia 4, Luwero 10, ka Moyo 9.
Kodumak aidules acie otoma apapula!
