TESO– lo eyait nu aseo naka NRM ko Ngora Norbert Osakan ngesi abu kolimo Abwaak 11 lu elomunitos kotoma otemwan aimoriarit Town council
kanuka aibwok amederan nuka epate loka NRM.
Osakan ngesi abu kolimok ewadikan Aicerit ebe aseo nesi itolositai ejok kilema aseeta adis bon kwapenat Oluwa, Ajuket, Abatai keda Akisim nesi ajaasi akiro nu amumu na ajai ailok egumu neda aponi itwobounere aseo konye ekaulo aponi itolosai aseo inapakinos egangitok abwaak.
Abu kolimo Etomet Emmanuel kwape lo abu kiteleka emendera kanuka
etem lo Mukura akaulo anangun abootin 4,326 ailany Joseph Oposia lo abu kodum 1,299.
Christopher Ojilong ngesi aponi kolimorai kwape etelekaran kanu Mukura
T/council akaulo adumun abootin 433 kosodi ailany Simon Adipet lo Abu kodum 320, Ojilong ngesi isinyikoikit itunga kere lu Mukura Town council alosit aise edolu aseo na awasia tetere kesi epedorete aseku engarenon lo abeit.
Kanuka etem loitetet loka Morukakise lo atiakunio Mukura James Akulia losek arai ekansila lo abwoikit eitela Kamodokima ngesi aponi olimorai kwape etelekaran akaulo akakaun abootin 1,584 osodi ailany Charles Emau lo abu odum 991, Akulia ngesi isialamikit aseak ke kanu ainakin ngesi amuno na aidak emederan ido abu kilip kesi bobo aimorikikin akanin kanu
aseo na awasia narai ngesi ekupup kanu asaun etem lo eroko erai imukeru.
Kotem lo Kapir, Charles Ebiau, ngesi abu omuk abootin 1,655 neda aponi
olimorere kwape etelekaran ilany Sam Omuron Enyamu.
Bonny Ochen lo lem erai LC3 Kapir osodete atiakakin epimbiro lo itetet lo Agirigiroi ngesi abu iteleka ameedera loka NRM keda emuku abootin 3,108
ailany Joseph Ationu lo abu kodum 617.
Otem lo Ngora, Charles Peter Obelon, ngesi aponi olimorai kwape etelekaran kanu NRM alomar olaagano loka aseo na 2021.
Ngora Town council, nesi aponi olimorai John Omaido kwape etelekaran
loda ebuni aingarenit keda ameedera nako NRM kanuka aseo na 2021 kanu
amariaun araun LC3 ko Ngora Town council.
Otem lo Odwarat, Gorge William Otim ngesi abu opedo aitamat eigolo aitelekaar ipaupa ke kanu aboloboloun eicolong lo LC3 etem loitetet lo Odwarat.
Kiloma otem Kobuin, Musana Dunkan ngesi abu konyam emeedera loka NRM ido abala ebe arai ainyinyir don orai alimonokin itunga aomisio ido isumunit ebe ebuni ngesi acereded anyun ebe arai ijaikin ngesi arereng ko 2021 ekoto ngesi aisialamikin itunga koipone lo ainakin ejanaki eloibecokina.
Kalaija otem lo Atoot, Wabwire Jaffar, ngesi abu iteleka ido ebala ebe ekapakina ngesi aterikin kede idio itunganan yeni iriikin ingareneka narai adau ngesi alimokin itunga ebe adolu alakunio.
Ko Opot Town Council ngesi abu ejakait Enos Ogwan ibwok kwape lo
ebuni adakit ameedera na ados edolu aseo na awasia naka 2021 ido ebala ebe emunor ngesi itunga ke asutakin ipaupa ke agweret na erai abootin tetere edumunete eijanakine lo ibecokina.
Karaida ekoni aseo nen lu ibironoro kesi imadete aromwa ido etooganete
oreria okapanakinos abongun kwape lu obonipe.
