KUMI– Itunga lu mam ejenasi lu esiopitos kesi apotu k’Naikanyet ikamikamata aibunga itunga iyarei itoni aiyar ediope ido ediope ngesi ejai aimad aromwa kadekis nako Kumi HCIV ojautene lo mam ibus.
Lu iyarei kesi abu polis kojen kwape Fazarih, lo abu kotwana, nepepe keda Titus Wadada nepetai ikaru 35, lu da eomitai ebe eraasi imugisu.
Lu kesi apotu odemutu eboda boda epikipik kodistrikta lo Sironko tupuruc nepe isawan itomonadiop keda atutubet kosodete ameun apuwa toni lailo Teso.
Ambrose Wafukulu eboda boda elope epikipik lo elomunit kocaalo lo Salira, ngesi abala ebe, enaparit ngesi alotok ke lu alosete osokoni ejok dodo ebongori ngesi obuni emotoka etupit ngesi okau. Etam ngesi ebe ainac mam apotu otuboros.
Kiyataki ngesi esipidi, iyatakinete kwi da aitodol ne do apaluna ngesi elopet akerit osipidi ke itoni ne aponiatar kwi isiebiata ngesi akou kosodete aisieb abulukuk na anapit ngesi ibiror ngesi obwounete kwi alemar epikipik otubunos.
Ebe ibodai da ice kesi do apotu ogeutu aibwapit kesi inomete isimun lailo Teso ne ejaasi icamanin lu ibodai toni do tupuruc nepe isawan itomonarei onangakinete kesi do Mukongoro ongoliarete kwi enaaba lo epikipik.
Alfred Okalang, lo erai lo apolon loka boda bodan ko Kumi ngesi abala ebe, mam kesi nepecep da itimitos atwanare ke ejakait kangon narai etomonyata kesi ikokolak
ngupongun.
“Ebeit isio aiswamainikin kesi kikam isio keda epikipik.” Ido, ice kotoma oboda bodan lu apotu olototo aireikin Wadada lo aperi adekis nako Kumi HCIV ngesi akotosi ti ebe airikakin ngesi itoni ipolisin abunere aidiekun aijar ke itoronitos da bobo ibodai imurok kanu duc aingarakit amukian ikokolak.
Polis ngedi ikwenyarit itunga acoikina apaarasio nu ebaga nu naarai ejaasi itunga lu emanete kotoma oponesio lu akoko kacut ipikipikin.
Kodumak aidules acie otoma apapula!
