KATAKWI –Kwape ejaar akwap nako Uganda eutara keda adeka na ekorona, edistrikta loko Katakwi nesi adau aicum ekato ne ejaasi etunga lu edeparitos 1500.
Na erai etupiton apoloikiton nu angaleu ko Distrikta, Christine Atim, ngesi abu kopacak Aicerit, aidules.
Abala Atim ebe, obu apugan nako kiding kitorite orionget lo angaleu kijukak edistrikta lo Katakwi Astrazeneca ikee lu ekato lu adeka na ekorona lu edolete 2710 kolap loiuniet.
Eyatakit ebe, adau Katakwi aitosomar nepetai ekato lo edolit 1500 ne ejaasi imwalimun, lu angaleu, lu ayuwara ka imakio lu eraasi ikaru 60 kuju kotupitete aigiruneta nu erionget lo angaleu.
“Ikee lu edolete 1210 kesi eroko ejaasi aingadis na edistrikta neda ebeitor akorara toma adekisia nu ididik,” eyatakit atim.
Ekeunit Atim aimony ebe, ipu itunga lu ekotosi aicum ekato konye itukurianetai kesi ebe, eyangauni ekato lo ainingosia nu ipu toma aijar na etunganan kwape nat, aibogo na awokot, airieb na akou ka acie ainingosia.
“Kopekwana, ijai iso icumi ekato ne ejaasi itunga lu ewomitai ebe, ejaasi toma oitelesit na adumun edake na ekorona imoriaritos ngun da lu ejarete keda adeka eseny, adeka na esukali, ka icie da kotupitete etiai lo ekia lo kopekwana ejai,” eyatakit atim.
Eja ngun da, mam ebuikitai itunga kere adumun ekato lo, abala Atim kiyatakite ebe, ejai apopula na ijaikino itunganan yen ekoto ekato aidokokin akan kanu ngesi acamun ekato.
Erai ekato lo, lo icumio erwanarei kidding na isabitin ikanyauni obonguni bobo itunganan adumun lo awasia.
Ikote akiro nen da, mam ber Katakwi edumunitor ainingosia nu eyangaunit ekia lo ne ejaasi ngun lu adautu adumun ekato anyoun olap lo iuniet.
