KATAKWI – Emamei itunganan yen ejai kuju na ekisil. Kanu amisiikin nu, kinerakinos ka Walter Elakas Okiring, apolon eicolong loka LC5 ko Katakwi distrikt. Mam ailapad ke Elakas esipo cut!
Adieket na adoketait nasodit ko Katakwi distrikt nesi aremoki Elakas abaluwa na abu kisiriengu aseak k’adoketait nako kuju.
Ebaluwa lo etolomuni adieket eraasi 29.03.2021, nesi icorakitor atubon edio epolisit ko Uganda aicimun Elakas. Francis Okwameri, eraban lo okansulo loko Katakwi distrikt da ngesi icorakit adieket ipolisin aicimun. Okwameri ngesi abwouni Elakas k’adieket.
“Ne ejai epolisit edio kere ko Uganda, karaida itoronitai Elakas, lo itoosatai kede Okwameri, ….. icorakitai yesi aikamun Elakas kede Okwameri kosodi akodun ngesi ne ajai eong,” asiomi ebaluwa lo iwadikat atubon lo egiparit Aicerit.
Eyatakit ebe, mam edolit ipolisin aimen aitodolikin ngun.
Joseph Akol, apolokiton ebood lo alupok ko Katakwi kanu emusaago 105/2018, lo aibunga Charles Opus, lo kolo arai arucokiton ke Amama Mbabazi kotoma aisup aseeta k’aseo na ekaru 2016. Anguriani Opus ebe, abu Elakas kede Akol kibungata ngesi kooteri loka Akello ko Katakwi eraasi 10.02.2018 kanu enguingui lo alupok.
Aicorakinet ke Paul Owino, atubon kanu aicimun Elakas kede Okwameri nesi elomunit akaulo Elakas ailokony ajaun adieket kanu apupio na emusaago kangol. Itoronitai Elakas kanu ailokonyenen ajaunun adieket kanu emusaago kangol ageun ne acopere aipup eraasi 15.01.2019.
Karaida ejakai aimo Elakas konye icorakitai ngesi kede Okwameri ajaun bobo adieket eraasi 13.04.2021.
Kotoma okisila, itunganan yen enyami emusaago lo aibunga yenicie nesi ebuni aitereikin kede awenio. Mam ber ejena arai ebuni emusaago ainyam Elakas karaida epegarit ber ngesi akiro kere nu itoosatere.
Etor Elakas toma atiokisio nu ipu noi. Abu komat apuwa kotoma abolobol na pac etosolio kanu alosit airabet. Abu Joseph Andrew Koluo kiteleka emakuk ngol koraun Elakas loiuniet.
Kotoma aseo naka Puraimares luko NRM, abu bobo etasuro kirum Katakwi akaulo esinema lo adakitor Elakas emuudu, airiam elago. Etoronitai ngesi kanu ebe akote ainom etepegan ke kede emuudu kangol. Apegarit Elakas akiro ngun kere.
Karaida ebuni Elakas aipal eyapesi ke kolapio idis lu eponitos, konye ikaru ikany ke lu aijaanakin kesi esalitos aseak lu ipu ikumanakinos akiro ke. Mam ber ejena arai ai adol Elakas kwape adauna adieket aicorakin ipolisin aicimun ngesi.
