AMURIA – Kwape ejaar adelor kanu iponesio lu atumunak, abwoikiton eyapesi lo epuresident ko Amuria, Lilian Eyal ngesi amonyaki engarenok lu ediini aimorikikin ka engarenok lu apugan aitiji iponesio lu arokok lu kwana etodutu atumunak.
Imarunit Eyal iponesio lu airidid iboro lu itibwangarete adam kwape nat ejae, ibore yen einakit lu ipu kakesi elomarete toma aswamusinei nu akoko.
Ekeuni ngesi nu kanaebalasa kosabiti kalo kotoma asuban nu enumunumiata ikristayon luko akelesia naka atulik na Akeriau apaarit naka lukagayok kec, Cosmas ka Damiano.
Asuban nu kesi apolokit episkopi lo atulik ko Soroti, Rt. Rev. Dr. Joseph Eciru Oliac, ido asuban kanu abu kidok ikristayon 256 kosodi aisiwen ikalia 10 ipetai.
Ikeunit Eyal ailipa ke kobala ebe apeleata engarenok icie lu idiinin ainac epelu lo aisisianakin atumunak ajaut ka iponesio lu ajokak.
“Ijaasi yesi da engarenok lu ediini ka epelu lo aisisianakin atumunak aisac iponesio lu ainakisi lu ipu kakesi edoditai,” abala Eyal.
Eyatakit ebe arai kibumakinos engarenok lu idiinin ka lu apugan aicor atumunak, epote araun itunga lu epolounete ka iponesio lu erioro.
Bp. Eciru ngesi abala ebe etamitos kesi nu epedorete aicor atumunak, konye ebe ejai ationis ne ejaasi auriak da.
Abala ebe abwangun naka lu Okadibong itorunit ne ejaasi auriak icie lu eroko ibwanakinete ipucito kojaasi imaten da ka emiusik lo edipo tai aiwalakin akwap.
Kowaike, ibusakit itunga aibwanakin ipucito lu emamete imaten lu itemerete, konangete asuban eroko akwap ecai kogwetarete emiusik da sek kisiarakinos itunga.
“Akaulo na ainyam ko opucit, konyou ngin itunganan alosit oreke konye mere bobo apaikin,” abala Bp Eciru.
