AMURIA – Ekisil Loikanyetaongon k’Obaibuli ebala ebe ‘siri iyari’ konye eraasi ngun bala amamiak kane ejaasi icie Ikuristaayon.
Kitoni eitabo lo ikisila lo akwap, mam ecamakit eyarit! Kanaikanyet kocaalo lo Aojangur ko Amuria TC, aponi kirarunai apese ilatatae kotwanikite amisiiri na ecie etunganan.
Na atwan nesi aponi ojenai kwape Sarah Atalo. Aponi kitigogongoi ebe erai na arwan auriat na ocaalo Amoototo Aojakitoi kotem Kuju. Ejenara lem na atwan kanu aipang aijar ke aipakas ooterin lu kotaun lo Amuria.
Karaida mam ber ejenuna ayarak kony ewomitai ebe lu aarak na atwan kesi apotu ingalasi na atwan kosodete aisiol kede aijerakin akou.
Esuumokit etasuro ngol itunga lu Amuria naarai mam ber bobo akiro nu eipone kangol etakanutotor bobo kotoma apak na euriana.
Kisiirikin ipolisin luko Amuria akiro nu atwanare kangin, apotu kokeriasi kede ekingok ekingok neda apotu okacunatar itelepai iuni.
Ebalasi ipolisin ebe, lu icimunitai kesi abu eong okeriana kitoni otogoi kec. Imoriaritos lu icimunitai; Patrick Kalema 21, Edwin Okello 25, kede Aaron Edumu, 20. Moses Muzima, apolokiton ipolisin ko Amuria distrikt ngesi etoronit eyarit lo kwape ibore yen itodunit aisonyaikit.
Eyatakinit ebe, arai engicun ebe ekodakina lu ikamunitai ka atwanare ngin, ebunio aitobwo ngul kotoma okisila kanu eyarit.
Muzima eja ngun da ngesi ecorakinit angor aisac atukit ikiliok narai ebe emina ngin aijar na apese toma oitelesit naarai itunga lu arokok kesi eminasi alosit kuare,” abala Muzima.
Emmanuel Ewalu, apolon eicolong loka LC1 kocaalo lo Aojangur ngesi abala ebe, ekoto polis aingarakin kesi aitolot ipotoloi lu akwaar ka aingarakin kesi aigol aboisio nu ewoere kuare ko Amuria.
Mam erai Ewalu bon anguriani konye itunga lu ipu kesi engitanakinos eipone, ‘eipone lo eswamaunor atwanare ngin komamei idio itunganan yen abu kopup.’
Samuel Eukot, apolon eicolong loka LC3 ko Amuria TC ngesi ilairat ebe, agear ‘ejie bobo agear.’
Eyatakit ebe, epote kesi aikisar lu irimete kuare kede lu eminasi aimat ejae. Itunganan yen edumuni ekisil ebe, eyarit yen icie nesi itereikinos ka awenio.
