Ikaramoja ikany kesi aremor adieket kanu emusaago lo akoko akituk ko Katakwi.
Erocunitai lu akaulo ajore kosabiiti akituk aolior kocaalo Aleles kotem Palam kosabiiti lo atubor.
Ikaramoja iwongon lu mam aponi kolimoroi ikiroria kec kesi apotu kotwakata koruruo kangol. Lu aponi kicimunai kesi ber ilobwatai ko Katakwi CPS.
“Kotoma airiamun kede apolok luka ayuara ko Moroto, apotu kacamanaros aitolot ipotoloi ko Teso kede Karamoja ido apotu kekamutu ikany ko Katakwi lu da idarekitos etube,” abala John Stephen Ekoom, RDC loko Katakwi.
Eyatakit Ekoom ebe, kotoma olap ediope, apotu lu ayuara kikamutu bobo itunga 10 kanu ebe, akodakina kede ikokolak lu akituk.
Abala ebe, elomunitos lu icimunitai kotemwan luko; Magoro, Okore keda Ongongoja. Ngul kere kesi ikamunitai kosabiiti lo atubor.
“Abuni eong aiyatakin aiswamanar kede lu ayuara kanu aikisar akoko na ejai. Eyalama eong kanu itunga aibumakin aikwenyanar lu ayuara,” abala Ekoom.
Abu kicorak itunga acakar aisidik amumu.
Walter Elakas Okiring, apolon eicolong LC5 KO Katakwi ngesi etacaunit ebe, Ikaramoja kesi apotu kiducokisi akoko edistrikt.
Abala Elakas ebe, mam bobo Ikaramoja ebongoritos obukec ido esalakitos airirit oikor neda epatanikitor abongunun akoko Katakwi kosawan lu akuare.
Etoronit Elakas eingarenone loko Karamoja kanu aibwabwat Ikaramoja lu ekokoete Katakwi.
“Mam Ikaramoja kere eroko konye idis lu mam engarenok ecamunitos alimor kesi emunamunaete ainapakina kiding Teso kede Karamoja, kau,” abala Elakas.
John Francis Otude, apolon eicolong LC3 kotem Ngariam ngesi abala ebe, Ikaramoja kesi akuare eraasi 24.2.2021 apotu kolomasi airut emwogo lo itunga ke.
“Nu kere eteikit eong bala eyaunete etenge ne ejaasi itunga ka,” abala Otude.
