Katakwi –Katakwi distrikt nesi adelo kanu amamus na ayuara na itekoro, aleku eripoota.
Kotoma oripoota lo alacunete engarenok lu kotemwan iwongon lo ikoruosi keda Karamoja, ipu akituk nu akokwar.
Eripota lo alacunete ikansilan ingarenikite Francis Okwameri nepepe keda engarenok luko itemwan iuni itodunit ebe etem Ngariam nesi atwania akituk 196, Magoro 173, Palam 142 kede Okore 138.
Mam ber imaarakitai akituk nu ewolioritos kotemwan luko Okulonyo, Guyaguya keda Ongongoja.
Francis Okwameri, ekansila lo ebwoikit etem Ngariam ko Katakwi distrkt ngesi abala ebe apugan nesi ekoto kiketak ayuara kotemwan kangun.
Abala Okwameri ebe, ejok apugan aitolomun isirikalei lu idarete ireria.
Etoronit Okwameri lu ayuara kanu ebe, agongora osiep ediope. Eyatakit ebe, kotoma akituk 5,700nu abu ayuara kikamu kotoma opotolo kec, akituk 328 kesi aponi kojeni kwape nu elomunitos ko Katakwi. Anguriani ebe, mam aponi kinyakunai akituk 140 naarai apotu lu apolok ajore kicorakisi aiyakar akituk ngun Karamoja.
Geofrey Omolo , apolon eicolong LC5 ko Katakwi ngesi abala ebe, asalaki amamus ayuara itanyikit itunga ibakor ido ebe, kotoma omusaagon 10 lu edumunene ngesi, ikanyauni kere erai lu aitem akiro nu akituk.
Abala ebe amamus ayuara nesi kwana itolitoli ebeit aswam karaida erai ngisi emeba lo ayuwar kodistrkta.
Acamunit Omolo ebe erai ainingosit na epol noi ido kilipite apugan amodiakin Katakwi ayuara keda aipuc kanu apolo.
Rtd. Maj. Jessica Rose Alupo Epel, atupiton epresident ngesi abu koridak lo eyait ajore katiakunet naiuniet kanu ebe eripoota lo esiarara otunga lo amamus amuno kiding itunga keda ajore nako UPDF.
Alupo ngesi abu kitamaran Brig. Joseph Balikudembe kanu akituk 140 nu abe, abu ajore kicorak aiyakar- Karamoka. Abu Alupo kokwamak lu ayuara abongonokin aigiseta kanu aiyar lo itunga lu areya.
Eyatakit ebe, inyobo erar ayangar apak aiyakun akituk nu ekokwaro?
Brig. Joseph Balikudembe lo eyait ajore nako UPDF 3Rd Div ngesi abala ebe itunga kesi mam ekoto alemar amuno kane ejai ajore.
Eyatakit ebe eraasi 13.06.2021, abu ajore kitolomu epotolo lo enyaritai Wusalam wote lo arai apeleikinet aiyakun akituk nu ekokotai ko Katakwi, Bulambuli, Kwen keda arino acie.
Epotolo ngon nesi ekamitere ikokolak lu akituk keda aidem imudun. Balikudembe ngesi eyatakit ebe, eraasi 12.12.2021 kikamunere akituk 6,000 kodistrkta lo Nabilatuk.
Abala ebe, akituk nu elimitai 328 nesi ajai angurian kiding Katakwi keda Nabilatuk, ido kwape ajore apotu kowanyutu engarenok luko Karamoja idulokina aitolitol ainapeta kitoni ajore aitolomun eporoto ebe akituk 140 nu ajaasi Nakales detach Nabilatuk kesi aponi kicorakinai ayangaro Katakwi eroko kiyakara Karamoja konye mam apeleikinet arai aitolior.
Eyatakit ebe ajore nesi itolosi ipotoloi ido imuudun 128, arasasin 1,074 ido itunga lu edolete 375 kesi aponi kikamunai ido ejasi ojeran lu egelegela.
Ebongokini nu iyarito Balikudembe ngesi abala ebe, ajore nesi adau aikamun keda akodar isirikalei adeiket kanu iyarito . eyatakinit ebe ajore nesi ebeit aibamakin atiakunet nako 3rd Div kanu ayuwara na akituk.
