Katakwi- Ekisil lo akwap nako Uganda nesi iketakit ebe lu eurinikinete idwe lu ikaru 18 kwap kesi ebilitos ikisil konye mam cabo ekisil iswamai? Do arai iswamai, inyo epolor aurinikino na iswe?
Eraasi ngun aingiseta nu epereto kotauon luka itunga ko Katakwi, naarai apolor aurinikino naka idwe. Idwe lu edolete 2,274 kesi apotinikin.
Kotoma osulai lu engicunit Aicerit kotoma olapio iyarei lu atubors kanoinoi loikanyetauni keda loikanyekangon bon apesur nu edolete 481 kotemwan 20 kesi adau eyapesi lo ikalia keda lo ikalai keda iriongeta icie aiwadikaun.
Ageun kolap loikanyetarei, 2020 kitoni olap loikanyetarei, 2021 idwe lu didik lu edolete 2,274 kesi ewadikau edistrickta loko Katakwi kwape lu apotuutu.
Irene Among, akansila na ebwoikit etem Akoboi keda Getom kokansulo loikanyet korai bobo egirigiran na asioman keda eipamurane ngesi abala ebe, awurinikino na idwe na ikeuna nesi elomunit naarai amunamuna ekorona akwap.
Among ngesi abu kicorak itunga kere ebe ekoto koricata idwe kec kodoco kanu aitam aitidisiar apotuunun na idwe lu didik.
Patrick Okali, emuron kadekis na apolon nako Katakwi ngesi abala ebe, kanu aitidisiar aurinikino na idwe lu didik ibusakinit auriak keda egangitok aicor keda ajaikit idwe kec aswam na itumorit .
Konye eja ngun da atupiton Epresident Rdt maj Jessica Alupo Epel ngesi ecoraki auriak keda idwe acamun aikis ekato lo elosi anatar Uganda kere tere karai edaun Ekorona kopatana angaikin idwe okaru ngol abongor asioman.
Eyatakit ebe, kwape ediope eipone lo itikunet ipesur alinganakin aurinikino ekoto kojaasi asioman osomero neda eyuwaratar.
“Esinyikoikit eong yes da idwe acoikina alinganakin aelo keda airim atukosia kanu aitikun kane ejai Ekorona lo ayangau ationis akwap.”
