KATAKWI – Kangin ibore ejai ageunet kede esange ke! Ejenasi ngun kokwap akolong ido iswamasi kangin paaran.
Ko Katakwi, apotu ngun kitodolikinos koingarenone kotoma osabiiti lo atubor.
Apotu engarenok lu atumunak lu lem ejaasi omakuk kikopakisi iswamaeta ne ejaasi lu apotu bobo aseak kisimasi aomisio asipokin nen.
Steven Otukei lo arai apolokiton atumunak ngesi abu kikopak iswamaeta ne ejai Isaac Ogwang lo pac abu arereng kikamu asipokin oyapesi ngol.
Akaulo adaun ekaru ediope esae itelepai kede apesur, aponi kituroi Otukei kwape ekirigi lo abu kopesik eingarenone lo itekoro.
Saraphine Alia, apolokiton ajakanuto ko Katakwi ngesi abala ebe, acamunit eyapesi ke Otukei aiswamanara kede ngesi kotoma apak ke na aijaanakin.
Abu kilip atumunak araun itunga lu epote adukunun aomisio nu itekoro kanu kesi aikeun kotoma apol.
Koiner ke, abu Otukei eingarenone lo itet araun lo emunokin aijaanakin ateker mere aisingarenit aijak iboro kanu akoikes kec bon.
Ogwang ngesi abu kilip engarenok lu itetiak acamun aimor einer kosodete aibumakin kanu acoikina eigur lo emina aitwatananar aseak kowai loka politiks.
Aponi kikopakinai ngesi agureda, epikipik kede iboro icie lu eyapesi kanu aiketakin arokoba asaya ateker.
Koiner ke, abu atupiton RDC, Denis Okori aitoduun aijulakinet kotoma oijaanakine lo ateker.
Francis , epolokit aitemonokin akiro nu okalia ngesi abala ebe, adumunot Katakwi apiyai nu edolete sh991m kanu atumunak ajakun kobakor konye apotu kopedosi ainyakun sh132m bon.
Abu kilip atumunak ainyakun apiyai tetere epatana aterar kanu icie da aimedaun.
Esalakitos kwana ber atumunak itoikitos aki.
