URUGUAY – Lo kolo aria Epresident lo akwap nako Urugua, Tabare Vazquez nesi abu kotwana Naesabiiti korai lo ikaru 80. Ekale ke nesi abu kitigogong ebe, erai ekansa lo iukoi nesi abu kiturian aijar ke kokwap akolong.
“Kede aiturur na epol, ilimorit isio atwanare na papa kosi,” abala idwe ke; Alvaro, Javier kede Ignacio Vazquez kotoma aiwadikaet na apotu kesi kigirutu.
Etacaunit aiwadikaet ebe, etwanit ekukuleru lo kosawan iuni lu atupuruc ido korai adeka na ajatar nesi adaun ikaru lu ipu nesi abu konges aijar ke. Kotoma olago, abala Alvaro Vazquez, ebe, karaida ejai ngesi aiyeng k’ore abu papake kotwana korai etunganan lo enapakina.
“Ikoto isio aisialamikin itunga luko Uruguay kanu amina kec ne ejai Papa kotoma apak na ejaanakina kwape engarenon lo akwap na epol ameda,” abala aiwadikaet na etolomunit ekale.
Okaru 1989, abu Tabare Vazquez koraun etunganan losodit araun engarenon lo Montevideo, akaulo araun lo ajenara kwape epresident loka etiimu lo emopiira, Progreso FC lo ejai oibuga lo akwap kangin.
Okaru 2005, akaulo airanyanar irwan aarei abu konye kopedo araun epresident, aibil aitutuket na ejanarar Colorado kede ipatei icie aitelekanar aseo.
Abu kojaun oyapesi lo araut epresident kitoni okaru 2010 ido bobo ageun okaru 2015 kitoni olap Loiuniet okaru lo ne abu ikopakinia eyapesi ne ejai President Luis Lacalle Pou loka National Party.
Abu Luis Lacalle kitamat Daniel Martinez kotoma aseo na aninik akiro ke. Kotoma olago, apotu ipatei icie kileputu aiturur kec kanu atwanare ke President ido kituritos icie ngesi kanu araut etunganan lo amina aijaanakin ateker komam etiakit itunga kotoma atekerin. Ejena loatwan noi.
