Ne ageunata idoon aitep, apotu akoriok kocopata akoru komunosi aimedaun komam ejenete ebe, ebunit ekorona igugunatoi katiokisio swi.
Kesakutu kesi ikorion kanu agwelar nesi konye angaunor aimony. Akoriok luka ekirididi, akimai kede emwogo kesi apotu kodelosi ebe, apotu ibeeyin luka ikorion kec kijesunos karaida etwasamaritos kesi apiyai nu ipu kotoma akoru.
Juventine Opolot, akorion kotem Aukot ko Soroti distrikt ngesi abala ebe, aijesun naka ibeeyin luka ekirididi anyoun k’osirigin sh1500 kitoni sh650 nesi abu kijaik ngesi aisal itururuei kede kilos 2000 luka ekirididi.
“Ageun ne agolere isomeroi kede isokoonin kanuka ekorona, apotu konye lu obebera kogeutu amodenen isio. Egwelete kwi ikorion kotiai lo edit naarai idoelel agogong kosi na ailamus,” abala Opolot.
www.aicerit.co.ug | Na Emmanuel Opio
Ne agolere isokoonin, arai akoriok anganyakit icop agwelanar ikorion kec ne ejaasi itunga lu emunaete ajon kocaaloi, lu obebera, ooterin ido lu ipu kesi do arai ainyam kwape adisiar esokooni.
Ekilo loka emwogo nesi ejesun kitoni sh350 anyoun ko sh1000 ido etiai lo ekirididi ngesi acakun kitoni sh650 anyoun ko sh1500.
Atutubet na ekilo lo akimai nesi egwelario kotiai lo sh500 kitirian kede sh1500 eroko egolokina akwap kanuka ekorona.
Aijesun naka itiaisinei nesi itigogongit aingic na abu erionget loka Economic Policy Research Centre eraasi 01.03.2020 kede akou na akirot “ainingosit na ekorona ne ejai aisubis ko Uganda.”
Etacaunit aingic ngin ebe, abu Agolio naka akwap kijesu agwelanar kwap ido lu ipu nepetai 76% kesi abalasi ebe abu kijesun kwap noi kosodi 12 kesi abalasi ebe, ejesuna agwelanar kwap mot.
Emarakit eripoota aijesun na aisubis ne ejaasi; aridakinio na eipone lo alosit, aigaliununo na adekak luka ekorona, alaanakin naka itunga, agolio na isokoonin, ibore yen etininik adumunio na iboro lu akoru.
Grace Adio, akorion na Onyamai ko Soroti distrikt ngesi abala ebe, ekeikisi ibodabodan itiaisinei lu alosit, ibore ebe etolitol akoriok aidol osokooni.
Abu Kilip apugan aijesun etiai lo akinyet tetere etiai lo alosit mam eroikini akoriok.
Dr. Patrick Eyudu, apolokiton aitolomio kede agwelanario na ikorion ko Soroti distrikt, ngesi etigogongit ekirididi kwape lo eroikit ekorona ebeeyi ke noi ageun ne agolere isomeroi lu abala ngesi ebe, etosomaete ekirididi noi.
Etacaunit ebe, akoriok lu ipu kesi anyamanakinio naarai amameotor kede aibungeta nu egogong nu agwelanar ikorion kec.
Aby Eyudu kilip akoriok aitolom ikorion lu epol ameda do aingad kesi kanu agwelar kikeunos ibeeyin koingaren ne epolor eipud kane ejaasi itunga.
Aingic na etolositai pac nesi ebeliarit ebe, akoriok 59% kede 41% ko Karamoja, Lango kede Teso kesi aminasi agwelanar ikorion kec kosokoonin kede lu egwelete kocaaloi, katuputupeta.
Itodunit ngin ebe, eroikino agwelak noi ageun ne agolere isokoonin.
Sharon Atukunda, na erai Chief Executive Officer ko Advance Afrika ngesi abala ebe, ekot aisikapikin akoriok kede acoasinei nu epedorata ailipa kede arucokina kede ipadic lu egelegela kotoma osokooni.
Elipit Atukunda aisisiaun agwelanar kotoma ogurupun kede aitwasam elago kwape arereng na epol kanu agwelanar ikorion kec ka aimor acoasinei nu ingarakinete kesi apolor.
Apotu akoriok kilipata ipadic lu eminasi apol kwapenat Edukans, Inter Church Cooperation (ICCO) kede apugan nako Uganda aiyatakit aijaanakin kesi agangat na ibecokina tetere epedorete aipirun arucokina kede aikeun adoketait na ikorion kec.
Michael Opio, akorion lo emwogo kotem Usuk ko Katakwi distrikt ngesi abu Kilip lu ojokotau aingarakin kesi kede acuuman nu epedorata aikeun adoketait na ikorion kec.
“Ekeun etiai lo aitac itunga lu ingarakinete aswam ido ationor adumun,” abala Opio.
Emilian Manishimwe, lo erai arucokiton loka Inter Church Cooperation (ICCO) Regional kanuka epurogram loka Civic Engagement Alliance ko Uganda, Kenya kede Ethiopia, ngesi abu kisinyikok akoriok aitanyanyaar aswamisinei kec kede aipopoun igurupun lu aimono tetere epatana adumun agangat kane ejaasi aingadisia nu apiyai.
Advance Afrika nesi itolosi epuroguram ngol. Kede aroikina naka iriongeta lu ipu kotoma apugan kanu ekorona, emunosi ipiriotin lu ipu akoru kwape esusut lo ebuni alakun akwap.
Kodumak aidules acie otoma apapula!
