SOROTI – Naebalasa kirumite aimuriamuria itunga lu kotem Asuret. Arai erionget loko GIZ nesi ajai akorakin itunga apapulai nu aigeruno na alupok kec.
Itunga 386 kesi apotu kimedautu kotoma 781 lu ebeit aimedaun. Samuel Eriaku, esisianakinan loti ko GIZ ngesi abala ebe, eraasi ngun ainapeta nu ejakai aitolot kotemwan luko; Asuret, Katine kede Tubur ko Soroti nepepe ka Toroma ka Omodoi ko Katakwi distrikt.
“Mam isio isei ikur kobale naarai ijai isio aimedaikin iitunga lu ipudasi aigeun alupk kec kotoma otemwan lu ijaanakini ber isio kopana.
Ebeit ainapeta nu angetakin okaru lo ebunit ido korai apeleikinet ayuar alupok nu itunga,” abala Eriaku.
Eyatakit ebe, emunokina GIZ aigang itunga ayuar alupok kec naarai nen nesi ejai esusut lo aijar lo itunga lu ipu ko Teso kaimoriarit Uganda.
Calvin Elenyu, egirigiran lo angaleu ka asioman ko kansulo loko Soroti district ngesi abu Kilip GIZ aijaikin arereng ne ejaasi itunga icie lu ipudasi aigirun alupok kec.
“Ketosomata alupok wok ejok tetere kanu oni ajakun kobakor. Epol ameda na alupok karai itwasam itunganan ejok,” abala Elenyu.
Eyatakinit ebe, edolit itunga aisac aomisioit na agwelanar alupok kanu ebe aimo abar konye kitwasamata akoru alupok kanu adumun abar.
“Mam alupok bon epedorete alemar ican kotoma okale kon konye kipoo ijo adam kon kosodi aitwasam kesi ejok, ibuni ijo aimedaun ejok noi,” eyatakit Elenyu, icori itunga lu emuriamuriasi aidarit apapulai kec nu aigirun alupok.
Agnes Susan Apolot, akansila na ebwoikit angor nu kotem Asuret ngesi eyalama kanu GIZ aipopoun aomisioit na aigerunun alupok nu itunga.
“Etiono adumun iriongeta lu epodokitos aitemonokin ingungeta lu aluopok koipone kalo konye erai aumokinet ebe abu Lokasuban kijaik GIZ arerengu ngin,” abala Apolot, na abu kiyatak ailip itunga aijaikin ngesi arereng acie na abongor okonasulo kanu ‘angoun atao do akorakin asea.’
Aiyalama nesi erumit iretin lu itunga lu abu etiimu loko GIZ okorak apapulai nu aigeruno na alupok kec.
“Emamei bobo ibore yen eyalongongoe eong ikamunite ayuara na alupok ka. Kijaik Lokasuban yesi arereng na epol kanu aiyatakit aisa Ateker,” eyalama adiope amojong.
Engarenok icie lu kotem Asuret kesi apotu isumunikisi aiyatakit ailipanar ne ejaasi iriongeta icie lu ojokotau abunore alakun Asuret kotoma atiokisio nu ipu noi aimoriarit ekadakada lo akipi kede ikee kotoma adekisia.
“Kosekata engarenok lu ejokuka ido koraasi lu epote aingarenikin yesi kaitekoro. Mam isekete engarenok kotupitos ipatei.
Mam aise engarenok kotupitete ipatei ebuni aingarakin asean edio. Ipupete?” abala Bob Owiny, atupiton eraban kokansulo loko Soroti distrikt.
Eyatakit Owiny ebe, edolit aseak apukor aijen naarai kesi epote aimony kanu ikaru ikany karai eseata engarenok lu mam eijaanakine kec esipo.
