Aseo! Eroko kide ekulai


Eroko kide ekulai
Eroko kide ekulai
Sports View Hotel 730x31 Ad

BUKEDEA– Aikesun ke George Steven Ekuma kanaesabiiti ebe elosi aibwo kwape obonipe kanu abolobol asekunio abwoikin ebuku lo Bukedea kotoma airabet na 11 nesi ajalaki aseak kede egangitok epate lo NRM ko Kide eedanakinos. Esideleu da ebe karaida mam atiakatiaka kotoma okaabin edauna ko Bukedea konye eroko iderit ategerio nu epate.

Ekuma nges abu ibiror kotoma aseo na party primaries na etolosio kanaikanyet eraasi 4.09.2020 kedumu abootin 10,470 kosodi ejakait Ikojo John Bosco akakaun abootin 14,319. Icie Peterson Omoding ngesi adumunit 2,869, Adome Julius Ben 2,366, Emasit Daniel 3,316 kosodi ejakait Francis Adome ailed kede imalo iraru abootin 299 bon. Ejakait Joseph Orone lo erai lo eyait aseo na epate loka NRM ko Bukedea ngesi akaulo na aitijenaar ebe ejakait Ikojo ngesi ebwok amendera abu itijena ebe etolositai aseo ejok ido kotoma ailajaara. Inyobo alomunia aseo ko Kide ikoni nen

Bukedea nesi adiope aiboisit na eteunitai ebe abeit amumu abwangun kotoma aseo tapi ijaikinini apugan aremun ajore aigangia ipolisin konye irwan nasodit abu kolot kede ainapaara. Ikoni nen kotoma aseak 82,529 lu ejaasi opate lo NRM ko Bukedea. Aseak 24,578 kesi apotu oseata Kobuku lo Kachumbala kosodi ebuku Bukedea nesi apotu aseak 33,639 bon kolototo abwo opuran abwaak.

Anita Among
Anita Among

Kanaikanyet, obuku Kachumbala aseak kesi apatanikit akerinikin aibwo okokoron naarai edelelei etunganan lo iganga kane ejai Patrick Opolot Isiagi. Moses Kedi lo kotem Aligoi nges abala ebe ageun ne alomaria ‘apolon’ Opolot toma airabet, eyapie kotunga ido ijaanakini ejok. “Ne duc ilateunio, mam isio da ibongori kede akanin naarai ejai ngesi kede Give Direct,”abala Kedi imuriemuria. Teni kanaikanyet, ejakait Opolot ngesi abu koya amendera kapatan akaulo na itunga 20,734 aibwo opura ke kotoma aseeta nu agelegela. Lo atupakit nesi Tom Okelotto nesi adumunit 2,546 kosodi do ekanyapuru lo ebe Omagor David Steven aidepun 1,290. Omagor inerasi kede Aicerit kanamukaga nges adelorit ebe apol aitukurian egangitok ke.

AI BODO? Tom Okelloto
AI BODO? Tom Okelloto
AGIR DO! Stephen Omagor
AGIR DO! Stephen Omagor

“Toni kwapekwana mam ipolisin inyakakitos eong eka redio,” Abala Omagor. Konye ko Bukedea, aseo nesi alosi sidisid akaulo na aseak lu ipu akurianikin alosit aise. “Icie enyamete lem owaitin kere konye lu ipu ationikit karaida asekun itunganan yen iganga osekuni do asalakin aidim emaido ke,” abala Immaculate Akwi nako Tamula ward ko Bukedea town council.

Kotoma aseak 58,302 lu iwadikauna kopate lo NRM aise Kobuku Bukedea, 33,639 bon apotu kongirikisi alosit aibwo okokoron abwaak kec. Ejakait James Ochukul lo otem Malera nesi abala ebe elomunit aikidiokus na aseak naarai epu itunga lu amamikit itunganan yen seuna. “Itunga lu abwoete kere adit itunga amuno kotoma,”abala ejakait Ochukul.

Eyatakit ebe MP Ikojo lo ebwokit sek amendera nesi adit itunga amuna naarai abu owolio kama ajaasi aseak adaun nepetai ikaru iuni, “atakanuni konye ikojo da bian nepe epuruunete akiro nu aisup aseeta,”abala Ochukul iyatakite ebe Ejakait Ekuma nesi mam aseak luko Bukedea emunos naarai erai duc etuan lo eremitai konye omameatar amuno ne ejaasi itunga luko Bukedea. “Sek esekakin Ekuma alosit airabet, obu obongu aisekel aseak,” abala Ochukul iyatakite ebe luce abwaak kwape nat Emasit kede Omoding amameatar alibunit ko Bukedea ido araasi lu alomutos aisawe kanu amoot akoikes kec. Konye Mary Akol na ocaalo lo Kokwech Malera nesi abala ebe abu Ikojo ibwoko amendera ebe naarai edeleleete aswamisinei ke kokwap.

“Lu ebalas ebe mam Ikojo edila eraasi lu ekotos engarenok aikor kesi ikapun lu emasiata ekamule konye aria ejaasi ijo akonye iwanyuni ijo ebe kotoma atamu ken a sodit apedo ejakait Ikojo aisupun apugan arikun akim iton ocalo lo Kokwech iton Kangole ibore yen lem asalit esubit airujasit kane ajaasi icalo,” Abala Akol iyatakite bobo aiturit Ikojo kanu ajiun esinia lo Kabarwa seed secondary school lo ejai apugan aiduk kede apiyai lu edeparitos Sh1.8bn.

“Icie ngun lu abwasi aarai lu aremunit ekayasi lo covid19 oisawe omunos ebe emudukitos aseak,”eyatakit Akol.

Nu abalas Abwaak

John Bosco Ikojo
OBORO DOM! John Bosco Ikojo

Kede abootin nu ikidioko, abwaak kwape nat Dan Emasit, Kedi Francis, Peterson Omoding kede Julius Ben Adome kesi asekutu ikulepek aililing ibore yen aticiepak itodunit ebe ecamunitos akiro nu abu erionget lo aseo opate kolimo.Inerasi kede lu iyemuto akaulo na alimorere akiro nu aseo, ejakait Ikojo nges abu kisiyalamik aseak luko Bukedea kilipite kesi ainyikokit aigang ngesi kotoma aseo na awasia na itolosio okaru 2021.

Abu da kilip lu abwoete kede ngesi aimorikikin kede ngesi kanu aitolomun abootin nu ejokukakanu amendera na NRM kokaru lo ebunit.
Konye kanaesabiiti inera koredio lo Bukedea, ejakait Ekuma ngesi abu imuwa nuke alomorit ejakait Orone obala ebe amojiritai aseo kanu aitutub ejakait Ikojo. “Mam aseo etolositai kotupitete ikisila naarai aponi kocamakinai idwe lu didik da aibwo okokoron kotoma aiboisio nu ipu kosodi eregestra da lo alomori aseo na adaunitai abunakin ibore icie tetere aisuburaar alimor akiro,”abala Ekuma iketanakin koredio.

Abu Ekuma kiyatak aitoron arotak iyemuto lu alimonorere isuulai lu aseo lu alomunitos aseeta kere anatar ebuku kobala ebe atacit ejakait ikojo ngun da ebe asabunun isuulai kokwamin lu eredio. Adautu arotak iyemuto amaikin alimunet ngin kwape amamiak kede aijangakina na eyaunit atwaniar aseo.
Inyobo itodunit aibongun ke Ekuma kwape obonipe? Alibuneta nu iyemuto ko Bukedea kesi itodunitos ebe abongun ke Ekuma aibwo kwape obonipe nesi ejai aisikwarun ikambin lu lem aponi orapakinai ko Bukedea kokiror lo aimorikikina kede apol.
Ekuma lo sek abwoitos kede ejakait Ikojo okaru 2016 nges aupanara kede ekambi lo engarenikit ejakait Wilberforce Tukei. Kosodi ejakait Ikojo nges ajai okambi lo engarenikit ejakait Moses Olemukan.


“Aibiror ke Ekuma akanin ke Ikojo nesi esesenit etiimu ke Tukei kwape amorosit ne ejaasi kesi, ido inyakunitai ngesi oisawe aibwo kwape obonipe kanu ainingio agogong kec kowai lo aisup itunga kede aitetenaanar ne apotu ibucariata,” abala asean lo mam akoto ikiroria ke ibeliarai. Konye akuriana ebe karaida eyamala Teso kanu Bukedea aitolot aseo nasodit komamei amumu, abongun ke Ekuma kwape obonipe nesi aticiepak ebuni aikeun agogong na ekambi ke lo abu kononokiar.


“Mam aseak luko Bukedea eminasi Ekuma konye elosio kwana aitwasam iponesio lu egelegela kanu abuikinio be itunga ne ejai ngesi, icie imoriaritos aitukurian itunga, abukor aboola kede aticiepak akoko aseo da!” abala asean lo.


Eyatakit ebe abongun ke Ekuma oisawe nesi aticiepak ebuni aingongar amina kec itunga mama ejai MP na angor Anita Among na pac abu alomu
aibwok amendera na NRM komam itepegitai.
Abala ebe ekotokin mwakacie ekisil lo aseo ko Uganda aijulakinio tetere aimik ngun lu ebwoete asekunio kopatei kosodete aibiror abongun bobo aibwo kwape obonipe naarai ibore ngin etapit ayaunun akiro nu amumu kede abukor aokot kotoma aseo na ebunit koingaren.


Kodumak aidules acie otoma apapula!

Karai imina ijo iyemuto lu, komorata keda lucie itunga.
Previous Inyobo alungia Kumi MPs?
Next Ajarakin isomeroi ka ailipasia

No Comment

Leave a reply