AMURIA – Nepe eyapiei alomar aseo kodoiknete bobo ecaman lo kotem Orungo, ko Amuria distrikt akiro nu elangir. Peter Enyou ngesi etingaaritos itunga luko oitela Moruinera, kotem Orungo ka lu Akeriau kotem Akeriau kanu ebe aidadaar apipai nu edaraca lo ejai kiding etem Orungo ka Akeriau.
Iswamauna nu naiyareit kosabiti lo atubor, ido ariengun nesi abu kodoik itunga ngul adumun ebe erito ecaman apipai ngun aijokor orot lo ejakai akoru ko ainapeta nuka NUSAF III kotem lo Ogongora.
Ikeunitai ebe abu Enyou kolot aiboisit ngin kosodi aitosom amotoka etipa kanu airitoro apipai toni orot lo enyouni ko Agora kotem Akeriau kitoni Ogongora.
Apotu itunga lu angurianete kidiaaros polis nako Orungo ibore yen abu koinak polis alosit airekin aiboisit na alemarere apipai ngun.
Tom Ejebu, ekansila lo oitela Moruinera ngesi abala ebe erai nu aumokin ecaman alosit alemar apipai ngun komam toni etem da ejeni.
“Enyunyurasi itunga noi kanu aswamisoit ke ecaman. Korai itunga adumun ngesi apak ngin ti aticepak enap aromwa nu ipu noi,” abala Ejebu. Ibeliarit ebe idowok lu elangir kesi ebe apotu kilotasi edaraca ngol kideleleunete do apipai ko kinga, ido kojai amuno ebe ti kitosomai kanu aitemokina etiido ngol.
Abala ebe ekoto Enyou kinyaku apipai ngun naarai ebe araasi nu orot kangol mere nu kotem lo Ogongora.
Daniel Ebuu, LC I lo Moruinera ngesi abala ebe ekadakit itunga luko
Moruinera ka Akeriau naarai ajai kesi amuno ti adumun ojokotau aingarakin kesi kede etiido ngol.
Abala ebe etubokitai Enyou apaasia adis bon kanu ainyakun apipai ngun arai mam epote kesi aitosoma ekisil.
Itunga icie da kesi mam eyalamasi kanu adakarere apipai nu orot kec ayangar orot lo ber bobo ejai NUSAF III aswam.
Ejai do itunga abuinikin ebe aticepak ecika ecaman apiyai nu apipai nu erot lo ejakai aswam. Ecamunit Enyou ebe edakarit apipai ayangar orot lo enyouni Agora abear Ogongora.
Koiner ke, abala ebe adau edistrikta ayangar erot lo itorit odaraca ngol, ido ebe kotoma apak na esupana egeun aswam ke.
Abala ebe mam bobo edistrikta epedori aitosoma apipai nu emojongitos kanu edaraca kangol konye ebe eyauno apipai acie, kobala da ebe mam ngesi inyakuni apipai ngun naarai itunga lu Ogongora da ipudasi aijanakino kane ejai apugan.
Akaulo atiakunere etem lo Ogongora kotem Orungo, Enyou nesi do kwana
bobo ineket emakuk lo ecaman kotem kangol.
Pac ipolisin lu Amuria, kesi atigaaritos Enyou ka itunga iuni kanu ebe arodi apiyai.
Lo arai apolokiton nu aingic ko Amuria pac, James Asubu ngesi abala ebe icie lu akacunitos kesi raasi, Charles Onyunyu 40 lo Onyamai otem lo orungo, Moses Epir 37 ka Joseph Olobo,35 kere lu Ongongora otem lo Alaki.
Asubu ngesi itetemit ebe Enyou ka ipaupake kesi ikamunitos kesi akaulo na adumun anguurian na etoronitor kesi Tom Epir ebe apotu lu osutokinos ngesi eraasi 4.01.2018 kuare oreke kosodete adisa ngesi ka alemar shs370,000 oreikitos ebe ikamutos Epir iteperi aberu ke Olobo, okai ke.
Kodumak aidules acie otoma apapula!
