KUMI – Akwena na epol aisiebit ikela ka angaranya ngesi kopekwana abwangun kotoma otaun lo Kumi akaulo na abelakinotor angor toma olaagano lo aigwet emaget akerit kanu acalar asiepai nu ainakisi kesi
abangal iwos nepepe ka akoikes kopol aiyenganakin.
Elaagano lo ngesi esipokinitos angor nu itolosete agwelanar na egelegela kotoma otaun lo Kumi, ace nu egwelanarete kotoma osokooni, nu epook nu idila duc asarab esupu lo emiekimieki, ka ace nu ejaasi toma agwelanareta acie.
Emaget lo ngesi abu kogear osabiiti lo atubor ido, itolositai kotoma
alaro naka Madarasa, komisiigit lo apolon lo Kumi, ne da aponiatar
angor kidamiatar akwap dup dup tir kis kis kitoni ailany. Idudei, ikisin ngaren obala akwena gag.
Rose Atim, amaneja naka Moonlight bar keda Rest land guest house nepepe keda Catherine Amuge nuda apotu odipoto akwap kosodete aitelekaar, kesi abalasi ebe, erai alosikinet kec aanyun ebe, edumunete kesi da etiimu lo angor, lo ebuni ageun aitolot aboliasinei nu egelegela tetere aitodiar atalanta kec ido nu epolok kakere, adautu kesi apak mam erionorete amoori kec, ibore kwana ayau atiokisio nu ipu ne ejaasi angor kwapenat
adekasinei nu ekotosi kesi aijangar kere.
Acie kotoma angor nu apotu ojaikios olagano kesi imoriaritos Amulen Helen, Amulen Rebecca, Muduwa Stella, Kulume Goreti, Apio Lilian Stella Mutua, Natunga Isha, Akwi Salume, Harriet Epodoi, Adeke Dorothy ka acie da.
Kodumak aidules acie otoma apapula!
