KATAKWI – Atukot na akoriok kojena k’aurianut kwape ESAAF Uganda (Eastern and Sothern African farmers Forum) orucokina kede OXFAM kesi apukosi etogo lo ebeitor aitolom ikinyom lu kolo sek.
Etogo lo nesi Naiwonginet, abu Moses Emabu, atupiton apolon eicolong loka LC5 ko Amuria distrikt ka Peter Cheli lo eyait akiro nu ibaren ka akoru, kopuko kocaalo lo Otubet kotem Orungo.
Epukori etogo, abu Emabu kisialamik ESAAF ka OXFAM Uganda kanu edukokin etogo lo Amuria kobala ebe, ebuni kwana etogo lo aisikwarun ikinyom lu kolo aminasi Iteso akoru.
Abu Emabu kilip akoriok lu Amuria aisac akerit egwelet ikinyom kotaun konye ebe, kikeutu obongosi kwana Egwelet ikinyom lu itolomio otogo kalo.
Peter Cheli ngesi abu kisialamik ESAAF kobala ebe, epote kesi aigang etogo lo opone lo adolonokin ka ayanganar akoriok aisisia eipone lo aitolomunet iran ikinyom.
Cheli ngesi apoga ebe, erai lo etogo losodit kesi adumun Amuria kanu aitolom ikinyom lu kolosek ido ebe ebuni kwana aitojokar akoru ko Teso kere .
Janet Atim, apolokiton igurupun luko ESAAF ko Orungo ngesi emarimarit ikinyom lu adautu kesi agear aidar otogo kalo kwapenat; ekirididi, akima, imare, ecorogo kede ikanyum kejaasi icie da.
Etacaut Atim ebe, kobuku lo Orungo nesi ejatar ka igurupun 14 lu iwadikauna keda ESAAF ka OXFAM Uganda ido kesi etegeasi ayaunun ikinyom lu egelegela aitolom odula kalo.
Charles Opio arucokiniton ESAAF ka OXFAM Uganda ngesi abala ebe egearitosi kesi erionget lo okaru lo 2002 ido apeleikinit ke aria aingarakin aikeun akoriok luko kwap owai lo aitolom inyamata lu itojokaritai.
Eyatakit ebe, isomai ESAAF akwapisinei kwapenat; Rwanda, Burundi, Kenya,swazland, Zambia ka acie da.
Aitetenaret
Kotoma aiwadikaet kosi ebe, ‘Eroko adieket ekodit Elakas’ kotoma AICERIT eraasi 25.11.2020 apotu ketolomutu ebe, “Esukunyikin emusaago ngol kitoni 22.22.2021 kanu abongun apupio,” etacaunit Arwacnedi.
Ikoto aitacaun ebe, erai ti apaarasio 22.02.2021 ido ekiror lo atubon erai Awecnedi mere kwa itolomunitor. Ilipit aitimio.
