KUMI– Esokooni lo akituk lo Ongino nesi ekopakin akanin nuka edistrikta lo Kumi akaulo na angetakinor adukio otoma adoketait na ipudar erionget lo eyait nu akoru ka icorin otoma oprojekta loka Regional Pastoral Livelihoods Resilience Project RPLRP.
Esokoni lo nesi etegeari Eminista lo apolon lo akoru, ibaren keda iboro lu ecor Vincent Sempiija Bamulangaki loda aupasi keda eswamak kere lu oyapesi lo akoru eutasi aitegeanariprojektan kere arai na karamoja keda Teso otoma odistriktan lu ejai eprojekta lo.
Erionget lo akoru otoma oprojekta lo edumunitai agangat ke otoma Obank
lo akwap (WB), nesi euta aiduk isokoonin lu apolok lu akituk kotoma odistriktan lu esekuna ko Uganda kanu aitojokaar aisubusa na ibaren, ido da adautu akorar ikinyom luka ibaren kanu aijulakin aipit naka akitun nu ejaasi keda ameda kotoma akile ka agwelario na atipet.
Sempiija ikopakini ngesi abu ining engarenok aanyun ebe idarete kesi adukena ngun osalakisi eraasi nu epote ayaun apol toma osokopni.
Isinyikoikit akoriok keda epitak aanyun ebe enyounete kesi kotoma akoru keda aipit na kolo kosodete aiting akoru ka aipit na itojokaritai naarai ejai aimedaun toma noi.
“Akwap nako Uganda ejai engaikitos akwapisinei nu okinga agwel keda agwelar iboro kec toma apedorete oni adumun enyadu lo epedori aisipedoor oni da anyoun kotoma obakaor,” abala eminisita Sempiija.
Dr. Edward Omaido, arucokiton loka eprojekt kalo ko Kumi, ngesi abu isinyikoik akoriok aanyun ebe ikinyom lu akituk, akinei ka akokorei nu aponi okorakinai tetere ikinyom eweyaros kolomunete ikinyom lu akituk ka akinei nu itojokaaritai osokoonin toni lu okinga.
Eyatakit ebe Kumi nesi abu kodum imongin 30 luka Sahiwal ka akinei nuka Gala. Dr. Michael Okwakol, emuron lo ibaren ko Kumi, obwoikite apolokiton ajakaanuto lo kumi, ijauni esokooni, nesi abu isialamik erionget lo akoru kanu eprojekta kalo loda abala ngesi ebe ebuni ayaun kwana apol toma odistrikta owai lo isolosinei lukwana epatana atukun kotoma engaar akwap osodete isokonin abongokin aswam.
“Etiono lem aituk esolo naarai angaara esokooni itolosete isubusin agwelanar kec orot keda kinga na esokooni,” abala Okwalinga.
www.aicerit.co.ug – Na Mathew Olupot
Eyatakit ebe ebuni kwana esokoni lo aisupun agwelanarak lu aiboisio nu egelegela lu epote egwelet ibaren ka iboro icie, kwangin iyatakini adumun
naka akoriok.
Charles Aisu, ecaman LC3 lo otem Ongino, ngesi esialamikit erionget lo
akoru kanu ka aseun Ongino adukokin esokooni lo adoketait nako okuju
kobala ebe ebuni ayaun apol otem ke ka Kumi distrikt aimoriarite Teso
kere.
“Epol eong aiyalama ebe apotu itunga kalu Ongino ocamutu aijaun arerengu na esokooni kalo, eyatakisi aigang apol na esokooni kalo engaar akwap ibuni oni aimedaun kwape Ongino keda itunga lu Kumi ka Teso kere,” abala Aisu.
Kumi distrikt nesi ikamunit arereng na aimedaunun ainapeta nuka
apugan. Kotem Nyero edukokitai atuta na atinen kwana na emasiatar ibaren akipi.
Ipu bobo iprojekitan ka atutai lu ejakai aswam ko Teso. Ko Bukedea distrikt, eutai angetakin atuta, ko Tajar, ilomari Kapelybyong adaun abokikin atuta, Onganyakonye ka icie.
