Epresident loka National Unity Platform (NUP), Robert Kyagulanyi Ssentamu kojena kwape Bobi Wine ngesi apeseiki apapulai nu awosan kanu aseo ne ejaasi egangitok ke.
Abu Kyagulanyi kolema emusaago ke kadieket kosabiiti lo atubor.
Etacaunit Kyagulanyi ebe, ibeliaritos apapulai nu edumunit ngesi ebe, aseo na ajaikina eraasi 14.01.2021 ebe, adumunit ngesi 54.19%.
Abu erionget lo aseo kolimo President Yoweri Museveni loko NRM kwape etelekaran kede abootin 58.64, kodumunite Kyagulanyi 34.83 kotoma osulai luka erionget lo aseo.
Naiyareit nesi apesikina Kyagulanyi apapulai nu aseo koyapesi ke lo ejai Kamwokya, kobala ebe, etelekarit ngesi aseo.
“Ajai eong ne kanu alimokin yesi ebe, irai oni ikulepek. Iyangau isio emusaago otunga ido edolit na aitolomun etube kotoma akiro kanu,” abala Kyagulanyi.
