KATAKWI – Ageun 10.02.2018, eroko akiro engenge kowaike Walter Okiring Elakas, apolon eicolong LC5 ko Katakwi distrikt! Eroko akiro nu emusaago lo ebe, abu kobwangun kooteri lo Akello ko Katakwi distrikt, ibwapakitos ngesi k’aburaco.
Erai ngesi kede Joseph Akol, apolokiton ebood lo alupok ko Katakwi kesi eutaikina kede emusaago lo epukokit Charles Opus, kesi.
Arai kolo Opus esupan abootin kanu Amama Mbabazi kotoma aseo na ekaru 2016. Bian eraasi 13.04.2021 nesi bobo abu Elakas kojaikinor adieket kanu emusaago kangol.
Isiokitos Elakas kede Akol adieket nepetai esawa ediope. Ageun ne etolomunia atubon Paul Owino, atubon loko Katakwi, acorakinet ne ejaasi ipolisin ebe aicimun Elakas, mam ailapad ke esubit bala erai na esipo cut naarai epol aiyalongong.
Emusaago 105/2018, nesi eyangaunit aiterot ne ejaasi iminan ke Elakas kede Akol naarai emamei yen ejeni nu etupakinete koingaren na ekisil. Ibakor! Mam edolit ilapio iuni da ageun ne bobo abu ‘eminat Itoroma’ komasia apuwa kotoma aseo naka MP kobuku Toroma, neda abu Koluo koderecaror bobo arapakin emakuk ke kairabet.
“Ne ejai epolisit edio kere ko Uganda, ….. icorakitai yesi aikamun Elakas kede Okwameri kosodi akodun ngesi ne ajai eong,” asiomi ebaluwa lo egirunit atubon kosodi Aicerit da adumun arerengu agipar.
Aiwadikaet ngin abu kotwaru etasuro konye bala emamete ipiigoi lu apotu kotitingoros aikamun akanin ke tape ebuni Elakas elope adieket Naiyareit kilajara elope.
Kecamu Elakas alosit adieket bian Naiyareit, abu atubon kisukunyik apupio na emusaago kitoni bobo 25.05.2021.
Eleleba adieket pis! Abu atubon kikisa abaluwa na pac etolomunit ngesi kanu ti aicimun Elakas kede Okwameri.
Kotoma adieket aponi kijaikinai Elakas kede Akol arereng na aingitingit Opus kede ajenak ke. Atubon da eporocit aingiseta swi.
“Kanu inyo mam yesi apotu kijukaratar Opus Soroti Regional Referal Hospital?” engisit atubon amuron, Martha Alado, kobongikini ya ebe, “ejatar adekan ka apedor adumun amukian kane ekotor ngesi kere.”
Abu Elakas kingit Alado ebe, “idumunit ijo abaluwa na aswam apugan?” Abu atubon kiretu ebe, “mam aingiset kwa kangin ecamakitai aingit kane.”
Abu Opus kolimok atubon ebe, aponi kicumai ngesi akonye kosodi akongu nako kediany arengeun be.
Aboket, ajenan ke Opus ngesi abala ebe, ngesi ajakuni Opus.
“Ibala ijo ebe, abu eong kamied ijo, ingai bo etei,” engisit Akol Opus kobongikini je ebe, “Lokasuban etei kede Aboket.”
Egiparitai Stephen Ekoom, RDC da edapadapat adieket apaaran ngin.
