PALLISA – Aiturur nesi abu kirum itunga lu ipu akaulo apupun atwanare
naka Faith Alupo, MP nako Pallisa distrikt eraasi 15.09.2020.
Mam apatana acamun naarai etwanikit Mulago, Kampala akaulo apaarasia
adis atubor kibiror ngesi kotoma amaria emendera loko NRM kanu abongokin aibwoikin angor nuko Pallisa.
Kiriamata iyemuto akwap, apotu itunga kilelebunos oreke Alupo lo ejai ocaalo lo Aitaritoi eitela Ajepet, kotem Gogonyo. Kwape MP na mam edaunit apak na epol k’airabet, ikidioko itunga lu ejenete ngesi ko Teso, konye lu ejenete aswam ke kesi eroikinit aiturur.
Abu Alupo koraun MP akaulo ailany Catherine Achola Osupelem na ber arai nako FDC eroko elomara NRM k’aseo na aponi kosipokinai akaulo Agnes Amede aijular aibwo Butebo distrikt lo atiakuno okaru lo 2018. Adau kwana
Alupo ikaru iyarei k’airabet.
Atamit ti abolobol aidak emendera loko NRM pac konye apotu itunga ikidiokoto okokoron ke, ibore yen abu kijaik Kaala Kevin Ojinga ailany ngesi kotoma abolobol na ajaasi angor awongon amoriarit; Josephine Ibaseret kede Catherine Achola.
“Ajai amuno kosi kere ne ejai Alupo naarai iswamat iboro luipu kwape nat; adukunun igurupun lu angor. Erai na atwaniar na epol noi kanu itunga luko Pallisa,” abala Esther Ikiror, auriat naka industrial ko Pallisa.
Eyatakit ebe, ikidioko itunga lu epedorete aswam iboro lu eposik kotoma apak na euriana na ajaut ke airabet, koleleete akiyo akonye ke.
Joseph Ongom, ocenike kana atwan, ngesi abala ebe, erai lem ija ke adiope k’ongarenok ko NRM ko Pallisa kobala ebe, “ebuni araun ationis na epol noi kanu aburokin abaagat ngin.”
Julius Okanya asean ke Alupo ngesi abala ebe erai ibore yen epipil noi kesi
atwaniar aseo do bobo atwaniar ituan da.
“Epipil noi! Okwe apotu isio enapakinos kitwania aseo konye do kwana atwaniar aijar ke nesi epipil noi. Ilipi Lokasuban isiboikin emoyo ke toma aipuc na mam edaun,” amonyi Okanya.
Kane ejai Catherine Achola Osupelem, adiope kotoma abolobolok kanu aibwok emendera loko NRM aseo na pac kobu kongetakin, abala ebe karai da erai lem Alupo na ilaganete ka ngesi kotoma politiks konye ajai kesi arucokina ka aiswamara na ejok kobala ebe atwanere aupake nesi erai atwaniar kane ejaasi itunga ka epate kodistrikt.
John Okoboi, atupiton eraban airabet nako Pallisa distrikt ngesi eturit na atwan kanu aisingarenikit akiro nu apol ka aimorikikna ko Bukedi distrikt.
“Atwania epate akukuleru na epol ido angaun alangiru kanu aburokin ngesi,” abala George Oule Omoding apolon eicolongo NRM ko Pallisa.
Agnes Amede, MP na angor ko Butebo distrikt ngesi abu ibirokin kwap kolelete akio akaulo apupun iyemuto lu atwanere ke Alupo.
Sarah Achieng Opendi MP na angor ko Tororo distrikt ngesi abala ebe atwanere ke Alupo nesi erai na ariengun kwape mam nesi epupunitor edio eripota lo etodie ebe adeka Alupo eroko etwana.
“Kwape angor nu ija airabet nako Uganda, ibuni atwaniar aupakosi na lem emorete keda isio ido Lokasuban ibwaik emoyo ke toma aipuc na mam edaun,” abala Opendi.
Ssenyonjo Kyeyune, RDC Pallisa ngesi abu itur Alupo kobala ebe arai lem ngesi na engarakit kesi kotoma aitiji adeka naka corona ne da abu ibwokokina edistrickt agangat na ti.
Bosco Oumo, apolokiton nu ainuk Alupo ngesi abu kilip itunga aisac aisirim
esabet ebe, etwanit Alupo kanu adeka na Corona naarai eroko adekis elacuna eripoota lo abeit.
Emunoi aidaikin Alupo ocaalo ke lo ejai Aitaritoi otem Gogonyo eraasi 23.09.2020, ido abala Oumo ebe, edolit ber itunga ainapakin.
