KATAKWI – Aiyalongong kede akurianu nesi esalit irumit itemwan iwongon ko Katakwi distrikt akaulo adeka na emwogo aroikin kesi.
Itemwan lu eroikit ationis kesi imoriaritos; Magoro, Katakwi, Akoboi, Getom keda Kapujan.
Adeka na nesi emunamunae akwi keda akito nu emwogo ido etacaunitos ipirioton ebe, erai ecucut lo akwangan lo emwogo.
Emina adeka na asukonokin kede adotono akwi nu emwogo.
Charles Okwakol, akorion kocaalo lo Dadas eitela dadas, etem Akoboi ngesi abala ebe, eriengunit ngesi akaulo alosit amisiri ke do adumun aarei kere esukusukit adeka na emwogo akwi aitaraun nu dosoik.
Daniel Opus, akorion ngesi apol akurianu ebe, ebuni ecaalo aitereikin keda etenge.
“Kirimo ijo osokoonin kere luko Katakwi ikeyara itiasinei lu egwelet emwogo, dobodo kwana emunar emwogo, ejaun etenge lo epol noi ido eraun itunga aimony na epol kokaru kangol.”
Akalaya na emwogo nesi kwana egwelario kiding sh35000 kitoni sh40000 ko katakwi distrikt ido emonyete ikalia lu ipu ebe, eunya etenge noi.
Francis Otim, apolon eicolong LC1 kocaalo Dadas ngesi abala ebe, ecaalo nesi etereikin keda adeka na emunamunai emwogo.
Abala ebe, amisirin nu edolete 15 kesi ecanican ekurut lo.
Godfrey Omolo, apolon eicolong loka LC5 ko Katakwingesi abu kilip apugan aruruk aigang edistrikt naarai etereikinos ka atiokusio nu ipu noi.
James Elungat, apolon lo akoru kodistrkta loko Katakwi ngesi ebeliarit ebe, esilim lo emwogo nesi iridit itemwan iwongon ido amisirin 60 nesi amunamun adeka.
Elungat ngesi abu kicorak akoriok alemar akoru akito nu emwogo nu emojongito.
Eyatakit ebe, akoriok kesi edolit angicun akoru akito nu itetiak kacut narocast one.
“Kolemasi aisudokin aitub kede egwelet akito nu mam yesi ijenete arai engalete.”
Eyatakit Elungat ebe, emame ekiya lo epedorete akoriok aisikia adeka ngin, konye etacaunit ebe kwape abongunata idowon epatana akipi ayarar ikur.
