KATAKWI – Naesabiiti nesi apaaran na abu Lokasuban kitalau! Kobuku Ngariam, arai apaaran na apotu aokot kobukorotor. Mam arai kanu alakun itunga karonis kwape ka Yesu Kristo konye arai kanu amaria apugan.
K’Ocorimongin Cell ko Katakwi distrikt apotu itunga komata emase kotoma apak na ajaar Peter Ogwang, lo imiela ayuar emakuk ke loka MP, aisup
aseeta. Iumitai itunga ido icie ajaasi oreret lo atwanare.
Arai egangitok ke Ogwang kede luka Augustine Otuko lo ikila aidimar Ogwang komakuk kesi apotu koretokinos.
Pasta David loka Katakwi Christian Center kojai Ocorimongin ngesi ediope
kotunga lu apotu kotukutu aromwa.
Itunga lu enerasi k’Aicerit kesi abalasi ebe, ibungaikitai Pasta David
obalasa kiboyei elope. Ogwang ngesi abala ebe, awanyunitai pasta David, ejai akoranakin apiyai ne ejaasi lu elepa kanu aisur ngesi.
“Ewanyunitai epasto ngopengol ibiribirei amotoka ka kede amoru ido adau eong apesikin angurian ka Ocorimongin Police Post kanu etube
lo ajokan ajaun,” abala Ogwang.
Karaida igurosi akiro kwangin, Ogwang 37 korai eminista lo cici loka ICT kede aitetenanar akwap ngesi adau apukor emusaago enaaba CRB 13/2021.
Kotoma aiwadikaet na elacunit ASP Ongom David Mudong, eraban loka polis karii nako Kide nesi itigogongit ebe, ejaasi ipolisin luko Katakwi CPS aingic emusaago lo abwangwabwangao naka iboro, aicuk amumu, atakanario na aputosia nuka abwaak kede aibungao naka itunga
Eyatakit Ongom ebe, atumunak iyarei lu ejaasi okaambi ke Augustine Otuko kesi apotu kogeutu ainom aputosia kotoma aurianet na esupia Ogwang abootin.
Ibore ngin ebe, abu kikeu abuonokin kane ejaasi itunga ke Ogwang, kosodi ejie aduun neda apotu enyamitok ke Ogwang ainomanar arasasin okwap kanu aisiarar itunga lu apotu komumuoros.
Eyatakit ebe, apotu DPC, OC CID kede Ofisas icie kipejokisi aiboisit ngin kede aingitanar itunga lu eteete eipone lo ajatar iboro.
Abala Ongom ebe, adautu kesi adumun ajenanuto acie. “Icimunitai itunga iyarei lu ewomitai bala apotu komumuoros kanu aingarakin aingic,” eyatakit Ongom kotoma aiwadikaet ke.
Etacaunit ebe, abu polis kisunyak ageun aicor egangitok luka abwaak kere kede aicorakin kesi aisac aisidik amumu kanu aseo.
Osawan 10 lu atibong kesi angaunor amumu ngin.
Alimor Ogwang
“Ageunit eong ainerakin itunga akaulo na apolon eicolong loka LC1 aisukunyuun eong kosurete itunga lu elepa aurianet kede ageun aibunga itunga ka,” abala Ogwang kotoma obaluwa lo abu kolacu.
Abala ebe, ipu itunga ke lu ibungatai ido kodumunenete amukian.
Eyatakit ebe, aputosia ke kere nu ejaasi Ocorimongin kesi acilicilasi itunga idis lu egwelitai ido kodakitos ikilenga, akito kede aswa.
“Arai apeleikinet kec aisur eong kede aitwasam akwara kanu aiyar eong koingaren na aseak. Acie amojong ngesi ekwenyari eong ebe, adaunito lu eboloboloete eong ainot ido enerunitos aiyar eong,” abala Ogwang kotoma
aiwadikaet ke.
Elipit Ogwang abwaak aiyong ekisil isupete aseeta kede aisac atacenen atumunak aiguronokin aurianeta.
“Mam amumu esakakini ijo abootin. Ajai ijo apak na aisup abootin ido erai na apak na ebeitor aiboikin aswam aingito kotoma politiks. Karai mam ijo isupit abootin, mam igeuni amumu. ……………..Mam eong alosi aiboikin kitoni eong awanyun lu amumu elecoritai,” abala Ogwang.
Enguriani Otuko
Eraasi 11.01.2021, abu Augustine Otuko lo ebwoi kwape obonipe kanu MP kobuku Ngariam kitolomu aiwadikaet kitoronite Ogwang kwape etunganan lo epolokit ajore na edukunit elope kanu aitukurian, acedanakin kede aibunga itunga lu ewomitai bala mam igangito ngesi.
“Etakani lem angangat kede epoget ke ageun ne ageunor aisup aseeta kotoma apaarasia nuka NRM Puraimares,” eyatakit
Otuko kotoma obaluwa ke.
Eyatakit Otuko ebe, mam na erai nasodit ajore ke Ogwang aibunga itunga.
Abala ebe, kiding kolap loitomonet aarei, ajai ngesi aisup aseeta kocaalo lo
Mukokoro eitela Abwanget kotem Getom, abu ajore ke Ogwang kede ipolisin kobwangwabwangasi esimu lo esapat lo awomitai ebe, ajai ainom aputosia.
Anguriani Otuko ebe, ejena do kwana ebe, ecamakit ekisil Ogwang aingareniki ajore airid itunga ke.
“Erai eingarenone ke lo icokicokete aokot nuka aseak lu mam ejenete
idio ibore,” abala Otuko kaiwadikaet ke. Eyatakit ebe, icie kotunga lu ibungatai k’Ocorimongin kesi etupaanaritai oreria kec kosodete airiunun kotogoi kec
Kangin engarenon lo epoga kede emerete lo apedor, abukor aokot, aitukurian kede aibunga nesi erai ekuriai, emamei ibore kotoma ke, icana, emameotor ka aomisio nu esiposi, mam emina itunga, ido mam emina NRM,” abala Otuko kotoma aiwadikaet ke.
www.aicerit.co.ug | Na Opio Emmanuel
Eyatakit ebe, Pastor David loka Katakwi Christian Center kojai Ocorimongin ngesi iriunitai kotogo ke ijo eunianar amukian ko VIVA medical clinic. “Eswamasi ngun korai Ogwang ecorakit.
Eroko akiro nu iswamauna, ekeunit Pastor David angurian ke kanu
aitukurianio ke eminista,” abala Otuko. Anguriani Otuko ebe, erai kwana ngol einono ke Ogwang aibunga aibunga itunga luko Katakwi do akerit apupeta nuka iyemuto einer akiro nu emamei esusut kanu aisub bala ngesi esuritai.
Inyo ebalasi itunga
John Opio lo Ocorimongin ngesi anguriani ebe, apolor kwana engarenok aicuk aseak aswam amumu ido ekoto lu ayuara aisac aise ikur kobale.
