Aluikinos lu ebiroros aseo ko Katakwi Eroko aseo na amwaka akiro kojai eyarit epuruuno ko Katakwi, abalasi itunga ebe anang edinget lo lem apuriei. Konye akaulo na amumu ajaun kiding lu abwoitos ne ilairata lu apotu kotwakiasi aseo aibwo kwape obonipe, komam apodokite nu apotu aseak kitolomutu.
MP naberu ko Katakwi, Violet Akurut Adome, na abu kotwania ne ejai aupake Jessica Alupo, na abu kidedia ngesi. Ilarakit Alupo kwap okaru 2015, ko puraimares luko NRM ka aseo na 2016, ne abwoya Alupo kwape abonipe. “Mam eong nepecepe da acamunit akiro nuka aseo naarai kere eraasi nu emokocatai,” abala Akurut, kiyatakite ebe elosi kwana aremokin angurian ke ne ejai lo epolokit aseo opate loko NRM. Alupo nges abu kidedia Akurut, ekakau abootin 38,582, okwetuni Akurut 29,435.
Akurut na abu kopedo apesikin etau ke aibosio kwape Ngariam, ngesi aponi kongedai kede aseeta kiciri abootin adis bon ko Usuk, Katakwi Town council, Getom, ne ejaikin Alupo aibwok aboko na Iusuko. Kiloma toma aseo itunga luipu kere kesi ebwongasi ebe ebuni Alupo aidediar Akurut, nu teni apotu kiswamaunos.
Esalitos kwana aseak itoikitos aki arai Akurut ebuni aipal aseeta ke karai esomun aibwo kwape abonipe kwa abu Alupo kisomauna ngun okaru 2016, akaulo na aidediar ko NRM puraimares okaru 2015. Ipolitiks luko Katakwi ageun okaru 2016, kesi imogimoga, ido epol atiakatiaka, ido eminista locici lo akompiutan ka aiwe akiro Peter Ogwang, ngesi ingarenikit ekaabi ediope ido Alupo da itingit esiep ediopet.
Mam ikaabin lu kere ecamunitos aiboikin kanu aitemokin akiro. Pac ne epejokitor President Museveni Ngariam, apotu Ogwang ka Alupo kisiumikisi aseak kedoto amaria epolon naarai ngin idiopet kakesi etemonokit epucit lo angenge okotosi ebe Museveni ailokony idiopet. Kireik ijo eipone lo ajaar aisek, kangin ebuku arai aisek yeni elomunit kangina.
Abu Ngariam kosek Akurut, kosodi Usuk aisekAlupo, kotiakete ko Toroma. Karaida atamit Apuno, atiakar abootin adis. Augustine Otuko, lo abolobolos kede Ogwang, karaida ipunipunitai erono, ngesi agir akiro kobala ebe emakacac aseo, kobala ebe kwape imodokatotor NRM puraimares elosi aibwo kwape obonipe.
