Kosabiiti lo atubor, abu airabet kotiro akiro nu amwakak! Arai ainyabuk akiro nu ainyakakin apak na edolit etunganan adaun ejai omakuk kwape President loko Uganda. Ibore icie nesi aomisioit na aikisar eyapesi loka RDCs kede abwoikitok luka ikearin kotoma airabet.
Karaida amwaka akiro kotoma airabet naarai apotu aomisio nuka MPs kotiakasi. Egangitos icie aomisio kitepegitos icie.
Kwape mam aomisio nu itutubio airabet inaciatata aroikin arai aimedaikin aseak, abu Aicerit kirimok aingitunun aomisio kane ejaasi itunga luko kwap kanu akiro nu enyabukae airabet.
Elias Emokori lo Kasoka, Bukedea:
“Mam edolit alemanar RDCS naarai eraasi eporoto loka President k’odistrikt, konye ekoto ti kinyakunai term limits tetere mam etunganan etwanikini oicolong,” abala Emokori.
Eyatakit ebe, kanu MPS lu ajore, emamei aswam kec kairabet naarai ejaasi lu ebwoikinitos eswamak kairabet (workers MPs).
“Ejai eong akurianu ebe, ekotokin moi iriongeta icie da kwapenat imurok lu adekis akotokin abwoikiton kec kairabet,” abala Emokori.
Tom Enokokin, Bukedea town council:
“Etei eong bala emamei epelu ke RDC ko distrikt naarai edaunit polis akiro nuka ayuara kede apolon eicolong loka LC5,” abala Enokokin, kiyatakite ebe, edolit apugan aitwasam apiyai nu etacere RDCs kanu aitetenara atiokisio acie kwapenat ekadakada lo ikee, anyodokok na irotin.
Eyatakit ebe, ekoto kinyakunai akiro nuka term limits tetere mam imikari atumunak arereng na aingarenikin
Kanuka MPs lu ejaasi airabet, abala Enokokin ebe, esubit bala erai akurianu. “Esubit bala ekuriaka lu bala ebuni apugan aibiror moi konye komam epelu kec etakani kairabet. Mam da yen ewanyunitai kotoma akamera ikeunit akan alimor akiro nuka itunga ke,” abala Enokokin.
Jacson Ojekede LC IIII Kamutur:
Akudiani ebe, karaida erai ngesi da epolitisian konye ekoto term limits kinyakunai tetere lucie da edumunete arereng.
“Ekot ti kojalakinai RDCS naarai ejaasi ipelueik lu mam LC5 epedori aswam naarai ekuriana ebe etwaniari abootin ke,” abala Ojekede.
Moses Olemukan, apolon eicolong loka LC5 ko Bukedea
“Emamei ameda na ainyakun term limits naarai ejatatar itunga ikulepek keda apedor arai edolit ijo abongor oicolong, arai mam,” abala Olemukan.
