TESO – “Kwape eraar atwanare na mam inacio arai opatana aitac etiai ke ti itunga engirikisi aitac kanu ainyakun lo atwan Papa Geresom Ilukor ti eiguro lo adoiki aanyanaret nako Kumi emamei.”
Ngin nesi anguurian na enerasi Ikuristayon otoma apak na aitun papa Geresom Ilukor lo abu koji toni atiakun aanyanaret nako Kumi kotoma Soroti.
Etwanit Bp Ilukor korai aanyanaret nako Kumi ikaru 12 ido Bp Edison Irigei ngesi ejaanakini kwape episikopi. Etwanit Bp Ilukor eraasi 01.09.2013, kiyengunite kwape episikopi loko Soroti Diocese.
Kotoma apak na atwania, Bp Irigei ngesi abu kolac nu angetakin ke tapuruc ido arai Rev. Charles Okunya lo apolokit nu asioman aanyanaret nako Kumi ngesi arai eraban lo ekale.
Inera apaaran na aiitun loatwan Ilukor amojong ke Loyce Ilukor ngesi abu ikeu ebe iguro kwana ekanisa naarai etopolosi itunga lu ingarenikitos nukec bon konye mere atupakin nu ebalai kesi atupite.
Abala ebe karai eroko loatwan ejari mam ti ekanisa itapasi ajokit ido ti esipokina kodoco kobala ebe eipone lo ejaar kopukwana ekanisa, mam papa Ilukor iyalama kotoma ailit ke.
Mam ti aanyanaret nako Kumi itapasi ajokit, “Mam emoyo Ilukor iyalama obongutu aitironikin ne ejai Edeke” abala Loyce Ilukor. Emalai eong Edeke apotu isio angetakisi aijaanakin ejok komamei akoko. “Arai kojai ti isio irai ibilioneyas, apotu alototo Bulaya ailipa kosodete Imusugun ainakin isio ibilangitin kasodete isio ayaun kaileleba mam agwelar araida idis. Nesi eperio ates ke kane araut ajenanut, etakanuni ebisiop lo eburokini ngesi karai ilip oni,”abala Loyce Ilukor.
Kiatakite ebe, “Inyounit isio okanisa mam itupitai isio iboro kere lu eyaunio abala ebe erai ngun iboro Ikuristayon.”
Amonyi amojong ebe atereikinos keda ipoisonin ido kopekwana anyam ngesi iposonin irwana auni.
“Itunga ngun kesi aomit eong ebe apotu ijukakisi Ilukor emun,” abala Toto Loyce Ilukor.
Abu da ikeu angurian ke obala ebe esomero lo Bisiop Ilukor Girls lo abu okilenike kogeu nesi mam iitunit ngesi karaida ainanakin asabunyu ageun.
Mam apotu apedosi adumun adis kane ejai lo epolokit esomero lo kotoma osawa lo ijaar aida ekalaamu.
Epuliida lo aanyanaret nako Kumi oraida engorit kalo atwan Papa Geresom Ilukor ngesi abala ebe epol ngesi aiyalama naarai euta aanyanaret asipokin, ido esialamikit Ikuristayon kere lu apotu ojaunos asuban nu, bon kwape ekale mam ipedori atemar ebe arai papa lokoosi bon kwape ekale konye arai lo akwap kere mere Teso bon ido arai papa lo amina aipuc.
Engetakin apak ke Bp Irigei, etogo loko ipisikopin kesi apotu kiboikinos kosodete asekun Okunya kwape ti episikopi loiyareikini konye apotu Ikristayon lu eroko itauon kiwadikaasi ibaluan ne ejai Arch Bishop Stanley Ntagali ido Okunya lo abeit aisiboikin olap lo Opo 2019 ngesi abu epucit ke kopet ekomio.
Apotu ngun kolomutu akaulo na Bp Ntagali aiwadikaun ebalua kimarite akiro swi nu ebe mam isiboikinere ngesi.
Konye Okunya ngesi abu elopet kosek alomar okanisa loka Reformed Angilican Church (RAC) ne kopukwana ijaanakina kwape ebishop loko UpperNile Diocese ido Ntagali ngesi ingist ekooti nepetai sh500m kanu ebe aitapaar aberu ekimat ke pac.
Ajaasi itunga swi toma aiitunio ke Naemukaaga ido apotu kolekata akiro nuta;
Christine Apolot MP nako Kumi ngesi iturit lo atwan kobala ebe karaida eijiri ke arai lo kotoma ido amamei aiwasiwasite.
“Arai papa Ilukor enaabi ido akiro. Nu abu inerite eroko ejari eutasi aitodolikin. Abu kolimok Bishop Irigei ebe; siri ekanisa etwaniki akanin kon. Nesi kwana ejaar eiguro toma aanyanaret nako Kumi,” abala Apolot. Kiyatakite ebe akiro acie numam itodolikina arai mam Ikristayon icasete ailip epote ngun da aitodolikin, kobala ebe ipu akiro nu edwarit lotwan Ilukor.
Kwana epuriei engunget okanisa karaida isiboikitai Micheal Okwi Esakan kwape episikopi lo okanisa kangon.
Samuel Ediau, egirigiran lo anyanaret naka Soroti lo abwoikinit ekanyanaran lo Soroti Odongo Hosea ngesi abala ebe ipu iboro lu isisiauni oni kane ejai papa Geresom Ilukor otoma nu enerit ngesi kanu oni aitodolikin, Teso ekot orai na ejai toma Iteso kere ka enerar papa “arai ngesi lo aseseni Teso kere ido ajaut wok ne erai kanu aitor nu enerit ngesi ido erai ainingosit ne ijai oni,” inerata engarenok lu apugan kalu ekanisa eporoto ediope idoli oni ne akoto papa Ilukor oni Iteso adolore kakere otoma akiro nu asioman na arai ekosio ke.
Opolot Elifaasi Ewalu, apolon esomero loko Ngora HS, ngesi iturit loatwan Geresom Ilukor kanu amina akiro nu asioman ido edila duc ngesi aicoranakin imakio ka itunga icie da aiyatanakin adoketait na asioman, ido abu isinyikoik imakio luipu lu eroko adoketait ijesakina abongor osomero ka aitiosom idwe kec da.
Rev. Charles Okwii lo sek arai egirigiran lo aanyanaret na Kumi ngesi iturit lo atwan kanu amina aila imakio lumam alaete atamit ngesi einer “Toa (kolaca), mam ibuni bobo keda igoen ngun” amina papa Eswamak lu ekanisa olaete, mam ebwai akiro arai lo elimokini ijo akiro oreet kon mam ebwai arai einer eitena.
Rev. Nathan Nafuye lo epolokinit imakio luko CoU aanyanaret nako Kumi, ngesi abala ebe eroko ekanisa egogong ido epote kesi aicat kwape imakio aitogogong ekanisa ka abu papa Geresom Ilukor kotiak ido icasite kotoma.
Rev. Eliodo Simon Peter, lo eyait South Teso PAG Pastorate ngesi abala ebe emorete kesi aswam kotoma aijaanakin ejakait Edeke kobala ebe; “Aabunit eong arapakin asilio kus tetere ejakait eyauni aibuses. Adumutu etau lo egogong kanu aiduk ekanisa karaida itorit apaarasia nu etioko.”
Eminisita lo akim, Esidonio Okaasai Opolot lo abwoikit aeraban kwape apejonon na angosibib, ngesi abu isukunyik einer ke Annet Among Anita na ilipit ekanisa amodiaun aipuc keda ainapakina okanisa ido icorakinit Ikristayon asalakin imorikikina ka aminanara idiope oboro lukolo abu lo atwan inerite.
Okaasai, ngesi abu ikopa agangat na sh30m ne ejai ekale ke abuton Geresom Ilukor lu ejukunit eraban.
Bishop John Ekude lo alomunit akwap na Kenya aanyanaret nako Kata lo abu olimonok akirot naka Edeke, ngesi abu kilip ekanisa aicat kotoma ailip ka aima Edeke ka amina ekanisa ka abu papa Geresom Ilukor iswama eroko ejari ido abu.
