KAPELEBYONG- Egeunete akiro kosiitos bala aisab! Erai kwana aimuriamuria ko Kapelebyong district naarai adaun akorar apiyai nu edolitos sh403m kanuka Emyooga, kwa esipor kotoma oripota lo etolomunit eyapesi lo agwelanar kanu elap loiuniet.
Apiyai ngun kesi eteraritai toma aibungeta nuka SACCOS 18 lu ejaasi obuku loko Kapelebyong.
George Ekunyu, lo erai principal commercial Officer ngesi abala ebe, aibungeta nu apedosi ailelebikin nu tupitono kesi adautu adumun apiyai ngun.
Kotoma ainapeta, Ajeleik Fish Farmers Association nesi edumunit (sh30m), Nyada market vendors association (sh11,145,000), Obalanga Women Elected Local Leaders (14,730,000) kosodi Kapelebyong County salon operators aingemun (21,210,000), kejaasi icie da.
Abu Ekunyu kicorak emedaunak aitwasam apiyai kanu apeleikinet na ejok tetere ejakunos kobakor.
Erai Emyooga epurogram lo elacunit apugan kanu aikeun itunga kokalia kede adumakin lu ipu aswamisinei.
