KAMPALA – Apugan ngesi kopekwan etereikina ka aingiseta nu elangir noi kotupitete eipone lo aronon lo etacere iteso, ilango ka icolin kanu akituk kec nu kolo angataro apakio nu elongilong.
Ageun apak na etegeara president Museveni etacit lo akituk, itunga lu engurianete kesi apotu kitolomutu aimony ebe etacanakino kesi isirigin idis kanu akituk kec.
Epuliida lo apolon lo apugan ngesi kwana etaarikin abongonokin aingiseta nu ipudatar itunga abongonokineta ebe kanu inyo etacere kesi isirigin idis nu mam iriamara ka isirigin lu iburaete kesi.
Kotoma pak na ingisingisia Epulida lo apugan (atoni general) Kiwanuka Kiryowa kotoma Osimu kanu ajenun alosikineta nu apugan, ngesi abu kotema ebe engimanakini apugan lu enguurianete etace narai ebe ikidioko isirigin.
Etogogongit do ngesi ebe, ebuni apugan ailelebikin etacit lo apesen kangin kotoam okaru lu epote oingaren.
“Mam apugan epalari aitac apesen ke karai mam irikakinit etacit lo apesen ke kotoma aileleba,” Abala Kiryowa.
President Museveni ngesi abu kitegea epotolo lo aitac Iteso, Ilangoi ka Icoloin kanu akituk kec nu akokuaro olap lo iyareit ido arai shs 50bn ngesi atiakanakinitai kanu itunga luko Teso, Lango ka Acholi.
Emedaunak lu isirigin kalu icie kesi eroko itauon engurianete ebe ikidioko ikapun ngun kanu aisilosikin etacit lo ibaren lu apotu ikapilak lu ajoresio okokuasi.
Karaida kisumunikinit koleje apugan ebuni ainyikokin atiakanakin shs 50bn angin ikaru lo apiai toma aiboisio nuko Teso, Lango ka Acholi kanu aisilosikin etacit lo ibaren, konye kiryowa ngesi ebala ebe atubi isirigin ngun kitoni aitidisiar ainyakun araun shs 30bn.
“Mam isio ilosi acamun ngun, ibuni abongor airabet na akwap ailip apugan aiyatakin isirigin ngun tetere itunga wok imedaunete ejok,” Abala Kiryowa.
MP lo agolitome na Kilak Gilbert Olanya ngesi etijenarit ebe ejai apugan aitac lu engurianete kidding na shs 300,000 ka shs 500,0000 ido ibore erono kakere ipolok lu kolo ewadikaunos kesi itaarikina aijojakinit aimo arerengu nae tacit.
Daniel Egoriait Edepu lo akoboi, serere ngesi kitdiarit aimony ke ebe angum apugan isirigin kec ido amwang acamanara kec.
“Acamanara ti apugan ka isio ebe eraun aitac akiteng adiopet shs 1.2M, konye ibore erono etacete jwana lu isio shs 100,000 bon kanu akiteng adiopet. Aomit eong ebe ejai ationis na ekoto angicio,” Abala edepu.
Geresem Eyimu 82, ngesi ikumanakin ebe kotoma akituk 65, atac apugan ngesi shs 5.4M bon ido adau ngesi kwana aitodolikin aimony ke ne ejai apugan.
Aiboisio nu kere auni kesi apotu kitoroto ocan lu ekingok akidingot na ikaru 1986-2003 akaulo na akokuarere akituk.
