Akadaki ekanisa, etoroni engarenok kanu atiakatiaka


kansilan luko Bukedea TC, lu adiakitos atwaniar aisilairao kanu eiguro
Sports View Hotel 730x31 Ad

BUKEDEA – Akiro nu alogera koponesio lu egelegela anyoun kaseo na okaru 2011, 2016 keda 2021, nesi etomonya ekanisa ko Kide.

Eraasi 18.5.2021, kasuban nu esiboikinere apolok icolongo luka LC III keda LC5 oicologo kec, ikanisan kere luka imulokolen, Atuliki keda lu Ageresa kesi apotu kikeutu akuudian kec ne ejai apugan keda lu ojokotau kanu ejie lo erukum engarenok luko Bukedea, ibore itolitoli da apolo naka akwap.

Eripoota lo edwar epone ke nesi asiomi ekimat lo Baptist, Felix Okwakol, kitacaunite ebe; kotoma aingiseta nu aponi koinakinai itunga luko Bukedea kere, apotu 94% kocamutu ebe apol atiakatiaka ko Bukedea.

Kingitar itunga arai ejaun tope apolo Bukedea kotom okaru lu epote koingaren, apotu 100% kogiroto cut ebe, mam apolo ebuni Bukeea arai iyatakinitos agarenok atiakatiaka, kosodete bobo 100 % kesi apotu kocamutu da ebe mam engarenok kere; anyoun ko LC1 toni LC5 ka MPs imorikikina ko Bukedea.

Kingitaar arai lukangai eyangunitos atiakatiaka Bukedea, apotu 97 % kocamutu ebe, abarak luko Bukedea kesi etobosata apolo na o Kide kitosomaete ikapun. Okwakol ngesi ekeunit ebe, ekanisa nesi eroko emoot iwaitin lu isiboikinere lu apotukibiroros keda lu apotu kotuboto aseo, kanu aitam aipopoun aipuc kede aimorikikin kanuka Bukedea na ejok.

Konye kejangun da, ‘emugolet’ lo apaaan, Moses Olemukan, lo aponi kisiboikinai oicolong, aiya Bukedea bobo ikaru ikany kwape LC5, kotoma ataamu na aiyareit, nesi einakini einer ke, ecamunit ebe eroko ejie loka politiks eroikinit Bukedea, kitosomaete ikapun, aitukurianio keda akoko na iboro luka egangitok ke.

“Iumokini ijo lolo da kotoma aseo naka eraban lo okasulo, abu eong karieng awanyun imotoka yen didi eloloun oboma keda ikapun kanu agwelegwel aseak lu abeit aitolot aseo na, konyenajokan, idau aibirokin itiimu ngin kwap,” abala Olemukan ineras keda Aicerit.

Olemukan ngesi atularit aielel kanu araun losodit abongokin oicolong aiya Kide, kitiriani keda engarenok kere lu ajaasi kolo Bukedea.

Ikiayari Ebaibuli kuju, abu kilair ebe, abuni aikajakin Bukedea amaapu karaida eroko idis ekotos atiakatiak Bukedea. Abu kisumunik aimorikikin keda lu apotu abootin kokad, acakar ikaabin, aitojokaar irotin, asioman keda apuconor keda lu engurianete koponesio lu egelegela kanuka Bukedea na ejok.

Kotem lo Kidongole, Samuel Okurut, ediope lo abu arereng ikamu abongokin oicolog kekwape LC III ngesi eturit eke Edeke lo abu kinyakak ngesi oicolong.

Abu kilair ebe ebuni aisingaren apuconor keda itunga kere lu ejai angurian keda ngesi kanu aitopol Kidongole.

Konye karaida emoete icie aipuc elomarete oyapesin kec, Bukedea Town Council, nesi ebucit atwaniar aisilairao kec kitoduutu atiakatiaka, icie ber aige ailaira komamete icie, kanu iceleta kec lu eroko irukumitos itauon kec.

Adema Stephen Budra, atupitaon ayaiton ajakanuto ko Bukedea ngesi, kotoma aisilaiar ikansilan, abu ber kolungite aisilaira ikasilan icie kanu amamut aimorikikina na idopit kokiding kec, ecelet keda epoget ibore abala ngesi mam ingarakini

Karai imina ijo iyemuto lu, komorata keda lucie itunga.
Previous Egurun Soroti kanu akorokoro na esokooni
Next Ekopakin atukono ayuar isuban Edeke

No Comment

Leave a reply

Your email address will not be published. Required fields are marked *