AMURIA – Ebala alimunet ebe karai mam ijo ikoto akoru mam inyami ido ebe kangin inyamat lu inyami ijo ekot ijo adaun isawan iwongon ikoriei. Konye kane ejaasi ejodok luko odistrikta loko Amuria erai nen atayo.
Karaida emoete itunga apiyai kowaitin lu egelegela, kane ejai Patrick Jeje Emiku lo Acoa kotem loka Acoa kodistrikta loko Amuria, egelakina eipone lo emania lo apiyai.
Konye kanu emane lo mam idelelei, alasisi ke na adumunun apiyai nuatitai nesi abu kodoo ebocokin ngesi akanin atupiton RDC lo Amuria, Geofrey Oumo Akol.
Abala Oumo ebe Naemukaaga, ejakai aitolom isap alomar ajore naka UPDF, Emiku ngesi ebe abu kodolok ngesi Naikanyet kosodi aingitar ngesi karai ajaasi ngesi da isap lu epudasi alomar ajore.
“Abu eong kalimok ngesi ebe ajaasi eong keda isap iuni lu ipudasi aitolomikino ajore,” abala Oumo.
Eyatakit ebe kiwala akwap, abu Emiku kinomak ngesi esimu ido abu kingit ngesi apiyai nu etemokit ngesi kanu isap ke.
“Abu eong kalimok ngesi ebe ajaasi sh500,000 kangin idiopet. Abu ber kopegak kotemari ebe karai oraasi sh1m ti do ejok. Konye abu kotema ebe kanu ber ageuna koyau ber ngupengun,” eyatakit Oumo.
Abala ebe abu ngesi kiworo Emiku kodaunite aitijenikin ipolisin luko Amuria ebe ejai etunganan lo icebokit aijodo apiyai kane ejaasi itunga lu ipudasi alomar ajore.
Iyatakite ebe kedolu Emiku ne ajaasi kesi apotu ipolisin korasakisi akacun ngesi kanu ajodon ka aituputuoro bala erai ekearit loka UPDF.
Abala ebe ijodot Emiku apiyai swi kane ejaasi itunga ido akimat adiopte kojena kwape Jesca Imalingat nako otem lo Abarilela ngesi esiokunit polis nako Amuria ido ebe nepe edoluni oyapesi loka polis, korasakini aijen Emiku lo erigakitai ipiigoi kobala ebe ijodoorit ngesi da apiyai nu atacakini ngesi apugan kanu okilenike lo abu kotwana.
Kosuulai lu ejaasi polis nako Amuria, itodiete ebe ejodo Emiku nepetai itunga lu edolitos 41 kodistrikta loko Amuria.
Kingitar look lo ecomilil ko polis abu kocam ebe etuputuoro lem ngesi kwape ekearit lo aicer auni ko UPDF ido ebe akodakina ngesi ka ikearin lu elangir ajore lu lem emoriatar apiyai.
