BUKEDEA – Atwanare na adoiki ibodabodan luko Bukedea nesi ejalakinit edistrikta keda akuriau na elangir noi elosete korotin nape icaki ebong, naarai ilatos kwana ikapilak lu aarak korotin, karaida ejaasi akameran orotin icie.
Engarenok ko distrikta kesi edeloritos kanu akoko keda eyarit lo alomu Kide, kotoma acoasinei nu egelegela.
Apolon eicolong LC V, ko Bukedea distrikt, Moses Olemukan, ngesi, k’Naemukaaga, abu kolimok ebworok Stephen Opolot, ebodaboda lo aarete ikapilak icie, keda ademar epikipik ke ebe, ejai kwana ationis otaun, na ekoto itunga kere aingarakin aitiji.
“Oumok ber ijo ekanisa lo ijai ne, mam na erai atwanare nasodit ko Bukedea.
Mam esabiti edauna, ija bobo oni otem Kolir ainuk bobo Chedikor Eria, esapat lo aarete ikapilak icie keda ayangar epikipil ke,” abala Olemukan.
“Eraasi nu kere awanyununeta ebe, ejai ationis alomu odistrikt, na da ekoto oni kere acoikina,” eyatakinit Olemukan.
Ikwenyarit ibodai ebe, ekot duc aidar apak naarai mam ikapun edaunos.
“Ibodai, ejena ebe ejooka ikapun, konye katamata kacoikina itunga lu eusete anootin adio kere. Ebaibuli da ebala ebe kayununete apak,” ecori Olemukan Ibodai.
Ecamunit Olemukan ebe, ejaasi ikokolak ipikipikin keda lu akituk kwana eyaunitos aiterot mama ejaasi itunga.
Konye ekanisa lo ajai aitolot ilipasinei nu ainyamakin emoyo ke Opolot nesi abu iken ebe, “Epone lopo atwania Opolot nesi itwania joda yen iyari Opolot,” abala eijiri ke ekimat John Stephen Okurut.
Itakadikina Okurut da kobala ebe, Bukedea nesi elimitere iboro lu esilok bon; akoko ibaren, eyarit, epiu, politiks na aronon, ido, alomasi kwana aiyar ibodai keda akoko ipikipikin kec.
Abala ebe, yen iswamai akiro ngun ngesi ekoto kotupa erot ke Yesu Kristo tetere edumuni aijar.
Kotem Kolir, eraasi 24.8.2022, nesi anukere Eria Chedikor, 25, esapat lo aarete bobo ikapilak keda ademar epikipik ke kalaije korongat lo Kapir.
Apolon Kupulian Edison Omuna, papake esapat, nesi amonyi ebe, abu William Ejiet, keda Moses Olepus, isap lupo atutubet ke, kongautu esapat ke kware isawan 8:00am ebe kanu anapar kesi alosit osiep lo Soroti.
“Abu Kedar ikoku anyoun 14.8.2022, ido eong ariengun kedolu eripota ebe, erarun ates ko Ngora,” etururia apolon Omuna.
Kotem lo Bukedea, ocaalo Kamon, nesi erokor esapat Justin Okanya iriyanar keda ariebo kadekis na Elgon Mbale, akaulo na ikokolak aibel akou aibwang keda ayangar epikipik ke.
Kejangun da, Silver Kedi, ecakan eboda kolomunite kocaalo Kachabule ngesi abala ebe, aiman kec etamit kosawan lu atibong, ibore einakinit kesi engirikitos aswam paka isawan lu muton.
Alex Enguloi, district crime officer ko polis ko Bukedea ngesi abala ebe, ejai polis etamit ingic epone lo alomunia atwanare.
