KATAKWI – Naesabiiti eraasi 20.09.2020 nesi abu President Yoweri Museveni kijaikina einer bobo ecie kanu adeka na Ekorona. Kotoma oiner ke, abu kolacak apukorio na isomeroi kanoinoi atukono nuko P.7, S.4 ka S.6, eraasi 15.10.2020.
Acie atukono nu abu ngesi kocamak asioman kesi nu ejaasi angetakin atukono ke nu aitutuonor. Karaida epukoritai isomeroi, konye ipiriotin icie kesi ekuriaka bala ebuni ngin aitotolikin asioman kwape mam aponi kocamakinete atukono acie asioman.
Koiner ke, abu President Museveni kocamak isawen lu idegei da apukor kanu elatok lu elomunete kedealomar kinga nako Uganda bon ebe, inwakunitai elatok ngul isawan 72 ebe engalete eroko elomuna Uganda. Eyatakit ebe, ekot apolokitok elatok mam acamakin elatok ainyalinyala ka itunga luko Uganda.
Idistriktan lu pac agolokitai kesi kwana alacakin ido esali elose lo itunga isawan iuni lu atibong ageun isawan 12 lu atupuruc. Ibodabodan kesi esalakinete isawan 12 lu atibong isomaete.
Akaulo adaun apak na epol egogolo, aiboisio nu ailip kesi apukor kede nu tupitono kwapenat; ailip na idiopediopen arai aitironikin kane ejaasi engarenok lu ediini arai bo aicorio kojaaasi nu tupitono, ecamakitai 72 atukokin ailip kotupitete nu tupitono, ailip na akuar kede aikoler kesi mam ecamakitai, atukonokineta nu ipu nuka ailip kesi eponio acamakin konye ekaulo kotupittete eipone lo ejaunor adeka konye epedorio ber aisilip itunga 72 Naikanyet ka Naesabiiti ido mam ecamakitai atukono nu isisianakinere idwe ediini Naesabiiti.
James Opio, engarenon lo ediini ko CoU ngesi esialamikit President Museveni kanu apukor apukor aiboisio nu ailip naarai ebe eraasi nu eteronorere iponesio.
“Mam eong acamunit nu inerasi itunga ebe, ekotosi ikanisan angaar kanu icakan. Erai epelu lo ekanisa aicor ka aisisianakin itunga ajaut ka iponesio lu ejokak,”abala Opio, inerasi ka Aicerit Naebalasa. Abala ebe, ainingosit bon na emina ajaun nesi awanyun eipone lo epedorata ikanisanlu otaunin aigaligal itunga kec.
“Epatana aitodolikin akiro ngun kokanisan lu ocaalo naarai ikidioko ikuristayon kitirian ka eiponelo ilelebatar ikanisan lu otaunin,” abala Opio. Ikote akiro nen da, abu bobo President Museveni kolacak aboliasio ageun. bon ebe, inwakitai aboliak isawan 72 eroko egeuna abolia ido ebuni ngin ajaunun kangin apaarasia 14, kicorakitete aboliak aisac anapit amasks ne ejaar itunganan abolia.
Icorakitai aigaliun aboliak kitoni abobobol na esison kere angetakin ido aboliasio nu otoma otogo kesi esalete egolol. Acie aicorakineta ke Presient kesi; Isineman ka aiboisio nu ainom epiki, kede nu egwelanare ajon aisal egolol.
Eyatakit e President ebe, ooteerin lu apolok kesi epote aiyatakin aswam kotupitete nu tupitono nu ecamarai kede erionget lo angaleu ido ooteerin lu didik kesi isinyikokinete ayanganario na inyamat kinga na eoteri kanu aitidisiarit ainyam kotoma ooterin kopodokitete nu tupitono. Isokoonin lu; esabiiti, lu akituk ka iraan kesi esalete egolol kitoni erionget lo angaleu aipirun nu ibusakinit atupit.
Mam ecamakitai etukonokin na itunga lu ipu ido eyatakit e President aikenyakin itunga luko Bugisu lu ejaasi olap lo aikep atupit nu tupitono nu aponi kocamanaroi kede erionget lo angaleu ka lu einono. “Mam cut ekotoi ekosio kede aidiya kotoma olapio lu akepio. Ekot lu ayuara wapenat; ipolisin aidar ainapeta nu esipokitai,” abala President Museveni.
