SOROTI – Euniaara apugan atosoma apiyai kanu aijukanakin idistriktan ka Itaunin acuuman swi konye nu aumokin kebila enaati kojalakinete ngin ipiri kanen.
Kwangin Soroti distrikt ka Soroti City nesi mam idio itunganan ekot aumokite ibore imodokokar kodamalasi aipanya korotin naarai icikasi esomak ataain komorisinga kipirete acuuman kane ejotoetete.
Pac Soroti Citi nesi abu kikeu eibworo kuju akaulo na abilakinotor acuuman nu irotin kere kwap.
Konye ipirioitin kesi ebalasi ebe erai ejalijal lo esomak naarai ipu iwaitin lu edumununia esite aboolai, kwape nat isolosinei lu elemete itunga swi luko otaun.
Etaun Clerk, Ambrose Ocen, ngesi etamit atoogan ne ejaasi imemban luka airabet lu okomiiti lo engici amidicio na apiyai kotoma apuganasia nu ko kwap aparan kana iwongonet pac akaulo na alacun akiro kotoma aurianet ebe emameete kwana Soroti keda acuuman nu ikisete irotin ka nu agasia.
Martin Ojara Mapenduzi, apolon eicolong lo ekomiiti kalo ngesi ediopet kangum abu koriengu noi kosodi aingitar ne ajai ationis.
Konye Robert Kahiru lo erai eciti Engineer ngesi abu kolekak kesi akirot adiopet itoikinitosi lucie aki ido ililingi etogo tii tii.
“Lu apolok koosi, ija isio keda atiokisio nu ipu noi kwape eswamak luko Soroti City, adiopet kakesi nesi na amamus na amotokan nu itwasama kanu aitodolikin eijaanakine otunga, amotokan nu apolok nu ikisete irotin kesi epiko isio aitemonokin agear ne abilakinotor kwap ido na nesi itakadikit isio noi,” enera Kahiru.
“Irotin lu ipu kesi inyodokokaasi noi ka agasia na icula korotin ido agwelanarak lu ipu kesi enyunyurasi noi ne ijai isio,” eyatakinit ngesi.
Ocen ngesi abu oriko MPs asesen amotokan nu ebilakina kwap kane esiponokitai.
Atingatingan aarei nu iregete irotin kesi abala Kahiru ebe abosiasi imusigin kec, kosodi alorei aarei nu ekakaete agasia kesi ewelewelunosi ngun da.
Amotokan akanyape nu sek etwasamai Soroti Municipaliti kesi nu amunaaros ido mam ber Soroti City egwalunit adio amotoka na itwasama, kobala ebe mam epedorosi aitemokino naarai ekakaarete apiyai swi.
Konye itunga icie kesi emuaritos nuke kobalasi ebe inyobodo aswam isomaete injinias lu etatai kotaun kogiriate iropito apugan. Soroti City, nesi ebe egwelit amotokan aarei ko sh500m konye mam edolunitos toni lolo. Ejai aingiset ebe edolunete cut amotokan nu?
Apotu MPs kisumutu ainerakin ka eminista lo apuganasia nuko kwap Raphael Magezi kanu aitam airiun Soroti agolot.
Philips Lokwanga Ilukol MP lo Napore West kodistrikta kalo Karenga, ngesi abu icorak eswamak luko citi aiswamanar ka MPs, kanu aitodolinikin ailipasia kwa kanu ne ejaasi iyapesin luko kuju.
Joshua Edogu, emeya lo ko Soroti City ngesi abu ikeu aimony ke na amotokan kanu aitalaun irotin kobala da ebe karai mam erurukio Soroti City, epote ikutuo ka apanya airumiar irotin.
Konye karaida ebala Edogu nen itaunin icie kesi ipagisaete acuuman.
Kodumak aidules acie otoma apapula!
