NGORA – Ejai ainerasit ebe, kangin itunganan erai Lokasuban ngesi ejeni apaaran ke na aurio kede atwanare konye esubit bala ican kesi bobo ebeit aitoron.
Ejaasi itunga ka ibakor konye adokena kec egelegela ido apese na ikaru ikanyauni ko Ngora ngesi esubit bala agirokisi do ibakor noi. Aridaki adek na iporotoi Kevin Atayo kolomunite kocaalo Ajelo-Ajelo kotem Agirigiroi Ngora distrikta. Mam ainyam da epatana kaneke naarai eriebete iporotoi adepar.
Erai auriak ke atola akio ailipanar agangat. Josephine Achipa, 68, tataake Atayo ngesi abala ebe, adau ikoku yen ikaru ikany eutasi keda ariebo. Abala ebe, egeunit ber adekan aipup bala epiyete
iporotoi ido kidinya kedol kuare.
“Abu eong ayanga Atayo adekis na kotem Kapir kanu awanyanar konye kopotu anaasin koyinakisi ikee idis kosodete aijukar eong ayangaar ngesi Ngora Fredaka” etatami Achipa.
Eyatakit ebe, okaru 2019 ko Ngora Fredaka, abu emuron kolimok nesi ayangar ikoku Mbale aijeny iporotoi.
“Arai eong apuserut ido totoke ikoku kayen emunara akou. Mam papa ke da ejena ne ejai. Atam eong aimo apiyai sh1m lu akotoi kanu aijeng konye ationor,” ebakibaki Achipa.
Abala ebe, eyatakin kwana adoketait na adeka ido aisululi ikoku noi. Ilipit Atayo lu ojokotau abunore aigang ngesi. Enerasi Atayo kede Aicerit koracasi akio kitururuei kobalasa. “Epipil iporotoi noi.
Mam eong apedorit ailikonor inyamat ejok,” amonyi Atayo. Emmanuel Asura, emuron lo epolokit Asura HeathCare Foundation ngesi abala ebe, edeka Atayo adeka na ebakai Tonsillitis (na ijaanakini iporotoi airieb kede abutuunun).
“Ekot kwana ikoku ajengoi na enyaritos Kamusugun Tonsillectomy surgery,” abala emuron Asura. Egarama kere lo amukian ikoku kayen nesi erai sh1m.Kanu aigangakin ikoku etosomata esimu 0775075092 okirora ke Julius Ojula.
Kodumak aidules acie otoma apapula!
