Na Ewadikak Aicerit
KUMI – Ediekit ka aiyaiya ituon esomak luko Kumi, nesi abu kopolok lu eyaitos nu ayuara kodistrikta loko Kumi akaulo na apolon eicolong LC 5, Nelson Elungat Mandela aretokin atorobusio ka apolokiton ajakaanuto Abdu Batambuze, kalo ikamunitos nu icuc, Rajab Ogogol kanu ebe eitolome lo itunga aswamusinei kodistrikta.
Mandela kotoma abulayan nu enyalal Ateso toma ngesi adesi aimula ikeete icop kuju bala etudo lo ilipit edou kobala ebe; “Abeit isio ajaikin aurianet na elangir naka edistrikta ne eraar CAO egirigiran, konye apotu isio edarata apak ewoja, mam abu kotakan, apotu etojokaasi alomar oyapesi ke konye apotu keriamakinos ka Ogogol igugunat abaasan auni.”
“Abu eong ecorak Ogogol mam aikunyakin ka abaasan ke naarai mam erai eyakia lo oyapesi ke CAO,” abala Elungat.
Eyatakit eirior ke ebe abu ngesi kiworo lo epolokit aingic kodistrikta, RDC ka apolokiton ipolisin.
“Kisisiau isio ebe arai abaluan nu akorakin itunga aswamisinei kanu ebeit kesi aitup, abu isio akurian kolom ebe inyobo ber eraar Ogogol edakit kesi konye kojai erwom ebe ekokotai apiyai swi kane ejaasi itunga tetere edumunete aswamisinei,” abala Mandela.
Iyemuto lu mam itogogongooritai kesi abalasi ebe apotu ber atelepai nu kotironosi yenicie iitinyo ibore abu koter aiyalolong ne ejaasi esomak apugan kanoinoi ngun lu ebe akodakina keda CAO.
Abala Elungat ebe asubit bala ajai akoko toma aitolomio na itunga aswamusinei naarai mam CAO abu kocama airiamun keda kakesi ka ekomison lo ekori asomusinei odistrikta.
Naikanyet tapuruc ikansilan lu eswopitos ka Elungant, kesi apotu kotereikinos ka CAO keda Ogogol lu eteunitos kesi ebe ajaasi aidok akan abaluan nu esomak lu mam etolomitai opelueik kodoco kojai aingic itolosio.
“CAO mam lo erai eipone lo isomatar iboro kotupak ber ijo aicoreta nuka ekansul,” abala LC5, lo akokitos icop itei Batambuze.
Konye Batambuze, ngesi abala ebe ajai ngesi aidok akan obaluan lu ikontrakts kobala ebe areit ngesi Mandela atitai.
Abala ebe ajai ngesi elopet angetakin aswam na ajai oyapesi ke eroko ikopakina emamuk ne ejai aupake na ejulunitai oporori ngesi elopet Kayunga.
Sam Akol, ngesi abu kolimok lu iyemuto ebe isabiitin iyarei kau abu ekansulo kilipite eyapesi ke Batambuze airiamun keda kakesi ka ekomision lo ekori asomusinei kanu aimony na adakuna kane ejai itunga ebe epol aija apiyai kane ejaasi kesi.
“Ariengunit eong ebe imeeban luka ekomision lu abalai ebe ejaasi aiyeng lu ejaasi oyapesin kec komam engetakitos aiyeng kec konye kobala CAO ebe mam ngesi epedori aiworoor aurianet naarai ebe ejaasi kwi aiyeng,”abala Akol.
Eyatakit ebe mam kesi iyalamasi cut akiro nu isomai CAO loda ebeit aijal eyapesi ke.
Batambuze pac ne ajaar odistrkta loko Hoima ngesi aponi koroikitete kanu ebe aitac esomak lu etuputuoro komam isomaete odistrikta.
Kevin Isoto akansila na ebwoikit itunga lu otem lo Kakures keda Mukongoro Town Council okansulo lo LC5 ngesi ebala ebe eswamae lo DSC ngesi erai lo itakadikit noi narai epol aimony kama ejaasi itunga okinga.
Eigur lo ngesi abu oinak aurianet na atipet na apotu lu ayuwara ojai RDC keda DPC lo abu ingarenik aurianet kosodete kesi acamanar acamakin CAO angetakin adokonokin akan ke toma abaluwan ngun osodi polis agear aingic.
Pac emeya lo Kumi ngesi atamit aituk itunga agear aidiya kanu akiro nu ikamunitos ecamusana lo ejai toma DSC konye mam ipolisin apotu ocamanaros keda ainapeta ke ido emeya ngesi ebala ebe mam ainapeta ke esangakitos karaida abu efaif okerikite auworoun ngesi abunere ti ainang emakode oyapiesi CAO obala ebe “emeya obu ingarak eong ekamu lolo eong itunga lu cut” abala Elungat.
Mandela lo erigakit ataai keda esuuti, ngesi ber arai ajarun atai kanu akapakin ailungulung egumu oyapesi loka CAO obala ebe apotu kesi kodumutu angurian kane ejaasi itunga luda emonyete ebe epol ecamusana ido ejaitai ikapun kanu ainakin itunga icie nepetai 90 asomusinei lu mam ebusakinit.
