MBALE – Kejaunos itunga ationis adaun apak na ewoja, edumunete acoa
na ajakun kotoma ke. Ngun kesi kwana esubit bala ejaasi aiswamaun ko Uganda akaulo President Yoweri Museveni alimor ebe, eyapiei kwana ekia
lo adeka naka ekorona adumun.
Ekorona lo edupudup akwap koiponesio lu egelegela kaimoriarit akerianut nesi egeunit anyalaun ko China kolap loitomonetarei okaru 2019, kipelun konye akwapin nu eriokok, ibore abu kijaik Uganda da ekoki aigol ikoruo ke ka aisimik itunga alosit kailajara.
Inerakini akwap Naesabiiti kosabiiti lo atubor, abu President Museveni kolimok akwap ebe, ebeit aitegiar aitetemonor ikee lu esubitai kore kanu aimukia ekorona eraasi 15.12.2020.
Abala President Museveni ebe, “kidum iyemuto lu aiyalama kane ejaasi imurok wok.” Eyatakit ebe, esomautu ipiriotin ikee ikanyarei lu eposik ido ikanyape kesi ejaasi aitetemonorio ido loikanyetareu nesi edaunitai angicun ebe, iswamae ejok noi.
“Ikee iuni lusodit kesi eraasi lu imukete ikur lu bala eseny ka ekorona. Angaleutu itunga lu ipu akaulo aitwasam ekia lo,” abala President Museveni.
www.aicerit.co.ug – na emmanuel opio
Eyatakit ebe, ebeit aitegiar ikee lu kane ejaasi itunga lu igaliunitai eraasi 15.12.2020, kiyatakite ebe, mam ngesi elosi aiyatakin akiro kaidules naarai eminasi ikangicak kojaasi atupit aipup einer ke.
“Kotoma apaarasia 40 amuno eong egeun aitetemonor amukian icie itunga, ibore ebuni aisupun icie itunga amisiikin ebe, iswamae teni ekia.
Ediope kotoma okee nesi abala President Museveni ebe, eraun lo ebuni
apukonor ne itorit ekwam kotoma aijar na itunganan kwape eminar adeka na ekorona aroinikin eiyengane lo itunganan yen ikatuni.
Eyatakit ebe, isomaunitai ibore lu inwakere ekorona ido ediope ngesi ebeit
aitwasam aimula do ecie nesi ebeit itoduuni angaleu na itunganan kotoma adakikan 30 bon.
Enera President Museveni ko kotogo ke lo ejai Mbale eraasi 29.11.2020 ido eraasi 29.09.2020 nesi bobo inerakitor President Museveni akwap.
Kane ejai eministri lo angaleu, itunga lu enwakunun ebe ejatar adeka na ekorona kesi adoloto 20,145.
Nu akerianut
Inera nu akerianut, abala President Museveni ebe, adol Uganda toma adoketait na epedoro aijar koipone ke bon ido kopedori da adumakin itunga ke aswamisinei. “Naarai itanyanya oni eipone lo iswamatar iboro kotoma akwap wok, apoloor kwana akwap wok,” abala President Museveni.
